Page 59 - MIN ON - JUNI 22.2015

Ministro contento cu Presupuesto di Onderwijsfonds aproba
unanimamente

Publication: Monday, 22 June 2015. Categoria: General

Lo inverti 9,6 Miyon Florin den varios proyecto di Enseñanza

ORANJESTAD (AAN): Diabierna ultimo a
tuma luga tratamento di e presupuesto cu ta relaciona cu e “Onderwijsfonds”, fondonan aloca
door di Union Europeo pa e sector di Enseñansa. Despues di 3 ora y mey, a aproba e presupuesto
unanimamente y asina a carga e confianza di tur partido presente den parlamento.
“Esaki ta sigur un momento historico pa Enseñansa y mi ta hopi orguyoso pa forma parti di dje.
Ami mes tin casi 2 aña trahando riba esaki y prome cu mi Minister Arthur Dowers y prome cu
ne, Minister Marisol Lopez-Tromp, pues un historia largo cu porfin a yega e momento
culminante”, asina Minister Michelle Hooyboer-Winklaar a bisa despues di a sali for di
Parlamento diabierna.
Den cuadro di e proyecto di “10de EDF Budget Support”, Union Europeo a laga haci diferente
evaluacion cuminsando desde 2008, 2010, 2012 pero Aruba no por a cumpli completamente cu e
indicadornan stipula pa EU tanto pa e parti di Public Finance Management ni tampoco cu e
indicadornan specifico pa sector di educacion. A keda den negociacionnan constante cu e
delegacion di Union Europeo pa por haci e proyecto aki un realidad.

Na 2013 a bolbe haci un assesment y a pesar di e crisisnan economico cu Aruba tabata pasando
aden, a logra mehora e public finance management di tal forma cu Union Europeo a nota un
mehoransa den nos procesonan cu finalmente na Augustus 2013 Aruba a logra ricibi e prome
storting di 2 miyon Euro.

Door cu e ley pa e presupuesto di e onderwijsfonds no tabata cla ainda no por a haci uzo di e
fondo mesora. Despues di eleccion di 2013 a surgi un cambio den cartera di enseñansa cual a
trece cune cu mester a bay haci inventarisacion y lista di prioridad nobo pa ehecucion di e
proyectonan cu mester bay via e onderwijsfonds. Mientras tanto a sigui traha riba e ley pa e
presupuesto di e Onderwijsfonds cu e respectivo departamento nan.