Page 61 - MIN ON 14 SEPT 2014

Capelo ta keda pa su alumnonan y lo sigui cu organisacion di e biahe

Publication: Monday, 14 September 2015. Categoria: General

ORANJESTAD(AAN): Den un entrevista cu
Hans Timmermans, rector di Colegio Arubano, el a confirma cu e trankilidad a bolbe por
completo na e scol y Alfredo Capelo lo keda pa completa e prome periodo di scol cu su
alumnonan.

E prome periodo ta caba dia 23 di september y riba dia 22 di september e alumnonan tin algo
planea pa nan docente. Hans Timmermans no kier a duna ningun detaye di e festividad cu e
alumnonan lo bay organisa como cu e programa mester keda un sorpresa pa e docente.

Timmermans a splica cu despues cu Capelo a entrega su retiro e siman prome nan a logra
combersa y a acorda, den combersacionnan di un estilo cu el a yama un “Hollandse
Poldermodel”, cu e docente lo keda te fin di e periodo y lo tambe – hunto cu un otro colega –
organisa e viahe pa Colombia pa e studiantenan. E viahe ta tuma luga na 2016. E rector a
menciona cu Capelo a expresa cu e dunamento di les ta pisa riba su estado di salud y toch e no
kier laga su klasnan na caya.

Actualmente e tin dos klas ainda y ta duna un total di 10 ora di les pa siman. Colegio Arubano a
logra haya un docente di p’afo di e scol pa tuma e lesnan di Capelo over.

Na e momentonan aki no tin vacatura pa docente na Colegio, pero semper e ta un reto pa haya
bon docente pa scolnan di e tipo HAVO/VWO, Hans Timmermans a bisa.

El a menciona tambe cu dos studiante a acerca su persona cu un iniciativa cu el a haya leuk, esta
pa lanta un “leerlingenraad” atrobe pa e scol y nan ta trahando pa realisa proyecto aki prome cu
fin di september.

E rector a bisa cu hopi studiante a pasa cerca dje personalmente of a manda carta pa bisa
despensa pa loke a pasa diamars, y e ta aprecia e gesto. El a bisa cu e por wanta hopi, pero na
momento cu 500 studiante ta bay contra bo ta dificil y ora e lesa cosnan expresa riba Facebook
manera “Dood aan de rector” of “De rector dood”, entre e berdad, mita berdadnan y cosnan cu
no ta berdad mes, e no ta perde soño pa esaki, pero si nan ta afect’e

http://www.diario.aw/2015/09/capelo-ta-keda-pa-su-alumnonan-y-lo-sigui-cu-organisacion-di-e-
biahe/