Page 19 - MIN VOS_Neat

Ta di spera cu e lo duna acto di presencia na oficina di SVb pa tur hende bolbe ripara
c’un biaha mas su persona como lider di MEP, ta trece mentira padilanti mal informando
pueblo di Aruba.

Ta algo di lamenta ya cu e persona aki ta esun cu ta bisa tur ora cu e kier bay bira e
Prome Minister di pais Aruba, anto e ta gaña di e forma aki y lo ta na su luga pa nos
bay papia cu PAHO y WHO pa nan bin c’un vacuna contra di gañamento, paso si nos
mira e fraccion di MEP, ta tur a cuminsa gaña.

No solamente e lider di MEP no ta papia berdad pero ta hinca su mes den un tipo di
fantasia ora cu e bisa cu ora MEP drenta den gobierno, e lo pone back e suma di 61
miyon Florin back cu lo ta suficiente pa e fondo sigui solido pa algun aña.

Con esaki por ta posibel si ta bay pone un placa back cu nunca Gobierno a tuma for di e
fondo y un biaha mas por ripara cu Evelyne ta papia cosnan for di sla y no ta splica
mes for di unda e ta bay saca placa pa pone back.

Dia cu nos a discuti riba e amienda aki den Parlamento, nos a bisa bon cla cu nos ta
laga e profesionalnan di SVb haci un analisis y investigacion pa nos caminda nan a bisa
nos bon cla, cu pa prome di Januari di 2018 nos por conta cu lo bay tin un deficit di no
menos cu 80 miyon Florin.

Pero ora cu analisa e expresion di e lider di MEP cu ta bisa cu su partido lo pone e suma
di 61 miyon Florin cu AVP a ranca for di e fondo back, cu lo ta suficiente pa e fondo
bay algun aña mas, cual no ta berdad.

E profesionalnan a bisa nos cu na momento cu bay mishi na edad di pensioen manera
cu el a ser cambia y cu MEP kier haci esaki segun vision di Evelyne y Glenbert, ya pa
2018 lo bay bin un dificit di 80 miyon y Evelyne no kier splica con e ta bay soluciona
esaki ya cu e suma di 61 miyon cu e ta papia di dje, nunca Gobierno a saca for di e
fondo aki.

Mi ta reta e Evelyne pa e subi facebook of e website di SVb y splica pueblo na unda el a
mira cu Gobierno di AVP a ranca e 61 miyon cu e ta papia di dje, ya cu tin tur cuenta
anual cu a worde publica caba.