Page 21 - EXTRA

Djaweps 8 Febrüari 2018 21

MUNDU DEPORTIVO

Amigunan di Jump Serve saludo. Nos ta den e siman
kaminda karnaval ta bai kulminá i nos ta sigur ku nos lo selebrá
nos karnaval di tal forma ku nos lo no tin ku lamentá nada
despues.
Deporte lokal ta praktikamente paralisá pa algun siman
kaba pero tin atletanan ku individual òf den grupo ta sigui train
pa ora nan mira akshon bèk despues di karnaval nan ta den
óptimo forma pa kompetí.

Den e kaso di Vòlibòl mes ta solamente un buèlta regular
mas falta pa playoff kuminsá den klase superior.
Siman pasa tabatin e kick off pa e weganan CAC kaminda
FDOK a anunsiá e disiplinanan deportivo pa Baranquilla den
luna di yüli/ougùstùs próksimo.
No ta tur federashon ta kla ku e parti di klasifikashon òf no
a yega na eskoho di e atletanan pa bai Baranquilla i pa buska
klasifikashon pa Weganan Panamerikano.

E parti finansiero ta keda un reto pa e titularnan ku ta
enkargá ku deporte. A duna palabra ku e presupuesto entregá
pa e Weganan ta aprobá i ta riba e trayekto pa e montante bira
disponibel.

Vòlibòl di playa tambe ta entre e disiplinanan ku lo bai CAC i
tin un plan di akshon ku tin ku kore di awor aki te ora nos yega e
fecha di kompetensia i kada luna, siman, dia i ora ta importante
pa nos. Pues ta di vital importansia ku e medionan finansiero
por ta disponibel pa nos keda riba e trayekto di preparashon.
E solo echo ku nos a klasifiká ta nifiká ku nos tin e nivel pa
kompetí den e Juegos, pero sin un preparashon adekuá nos lo
ta den desbentaha.
Nos selekshon femenino
U23 tambe ta pendiente pa
kompetí den luna di yüni den
un torneo regional di Cazova
ku e aña aki nos hermana isla
Boneiru a apliká pa organisá.
Aña pasá e torneo aki mester
a tuma lugá na Virgin Islands
merikano, pero e no por sigui
dor di kanselashon di algun
pais partisipante. Nos tin e
pleno konfiansa ku Boneiru lo
por bai organisá e torneo aki
di un forma sublime mirando e
dinamismo di e direktiva nobo
di FEVOBO.

Proksimamete lo yama e
pre selekshon femenino pa
yega den un tempu korto na e
selekshon definitivo mirando
ku ta apénas 4 luna ta separá
nos for di e kompetensia. Pa
U-23 Maskulino no tin un
fecha stipulá ainda ya ku niun
otro pais no a konsiderá pa ta
anfitrion.

Oké te aki nos Jump Serve
di e siman aki. Nos a informá
bo awe tambe ku plaser i si nos
no topa den kaya e wikènt aki
nos lo tende di otro, otro siman
djaweps. Gosa Karnaval ku e
sentido síviko na mente.