Page 65 - MIN TTC 16 NOV 2015

Pareha kier a mata otro na Boca Mahos

Publication: Monday, 16 November 2015. Categoria: Policial
pero pa ora Polis a topa nan ya e amor a florece bek

ORANJESTAD (AAN): Diasabra despues di merdia Polisnan a wordo pidi pa bai cu urgencia
den direccion di Boca Mahos. Eynan tabatin un Ignis color blauw A-59791 cu un pareha den dje
cu a caba di bandona e area.
Segun testigonan un rato prome nan a mira e pareha pafo di e auto den un discusion. Te hasta e
melding cu Polis a haya ta bisa cu e homber kier a benta e muher for di baranca na Boca Mahos.
Polisnan di Santa Cruz a bai na e sitio aunke e yamada a drenta como 10 minuut despues di e
caso.
Otro patruyanan tambe a wordo pidi pa tira bista riba e auto blauw Ignis. Un rato despues a
drenta informacion cu e auto a wordo señala banda di Sabana Liber. Djey el a drenta Brug di
Madushi y direccion Montaña.
Banda di Boegoeroei el a subi caminda grandi y cruzada di Shaba a coy direccion pabou pa
Bubali. Pabou di Save a Lot el a lora man drechi pero tabata tin un Unidad di K-9 di Polis
sperando riba dje. A bai su tras y ta dune señal pa para.
Den e auto e pareha tabata. E homber y e muher ta papia spaño. Segun e homber ta cosnan di
pareha. E Polis a pidi e muher baha for di e auto. A bai cune patras y asina a papia cune. E muher
a admiti cu nan a pleita cu otro. A Admiti cu tabata tin problema. Tambe e muher a bisa Polis cu
e no kier entrega keho pasobra nan a haci bon caba.
Amor a florece rapidamente pasobra algun minuut prome a drenta informacion cu e homber kier
a benta e muher for di baranca na Noord Kust. Polis a tuma datonan necesario for di ambos y
asina nan a sigui nan caminda. Si algo pasa despues tog Polis tin caminda pa yega.
http://www.diario.aw/2015/11/pareha-kier-a-mata-otro-na-boca-mahos/