Page 51 - MIN ON - APRIL 17,2015
P. 51
A detene prome sospechoso di maltrato di cabesante di scol Print E-mail
Friday, 17 April 2015 14:40
Comparti
DSC_2063
Diabierna mainta Recherche di Polisnan na San Nicolas a detene e prome sospechoso den e caso di
maltrato di e cabesante di Filomena College Basisschool na San Nicolas. E siman aki un grupo di mas o
menos 5 hoben a yega cerca dje na momento cu e tabata cerando porta di scol merdia, a atak'e,
maltrat'e y bay lag'e herida atras.
For di varios banda a sali critica pisa contra e forma di proceder aki, esta cu alumnonan ta tuma ley den
nan propio man y ta hinca den nan cabes pa bay agredi un meneer di scol. Esaki ta un atake frontal
contra nmos reglanan, nos normanan y nos balornan ancra den nos forma di biba riba e isla aki, den cual
tur alumno tin masha respet pa maestronan y specialmente cabesantenan di scol.
Den su declaracion na autoridadnan policial, a sali afo cu algun dia prome a horta e laptop di e
cabesante di scol, pa cual el a entrega un keho di ladronicia y di cual tin sospecho riba un ex-alumno di e
scol basico pero cu awor ta studiando den e seccion MAVO. Probablemente Polis a bay atende cu e
studiante aki cu a dicidi e ora pa cera un gang pa bin bati e cabesante di scol, relaciona cu e keho di
ladronicia cu el a entrega.
Por spera mas detencion ainda den e caso aki, asina Vocero di Polis a confirma awe mainta. E no tabata
den posicion pa duna mas informacion, manera nomber, edad y detaye di e caso mes, pendiente e ekipo
di recherchenan cu ta investigando e caso. A keda cu asina cu tin mas informacion disponibel, cu lo
suministra esey na comunidad mesora.
E mensahe cu comunidad mester manda na e grupo aki ta, cu no ta acepta e tipo di actonan asina. Ya no
ta un acto di baldadi mas, sino mas bien un acto criminal! Cera un gang pa bay agredi un hende riba
caminda publico ta un acto criminal, den cual tin un castigo di prizon pisa mara na dje. Hobennan hopi
bes no ta para keto na consecuencia di nan actonan, cu por marca henter nan bida despues y stroba nan
estudio pa por forma un carera profesional den nan bida.
