Page 5 - AWEMAINTA

AWEMainta Diabierna, 20 October 2017 5

Reunion urgente

di SIMAR cu topico

“klasnan sin airco”

super exitoso

DIRECTIVA di Sindicato di Maestro di Aruba
(SIMAR) a yama un reunion di caracter urgente
ayera atardi, caminda inicialmente lo a papia di e
posibilidadnan con trata cu e dianan calor di e siman
aki, ya cu te cu dialuna mainta no a ricibi reaccion di
Minister riba SIMAR su proposicion.
E punto aki no tabata vigente mas, mirando cu net
prome cu scolnan primario a termina dialuna, e
desicion di SKOA y di Minister Hooyboer-Winklaar
pa alumnonan bay cas mas trempan e siman aki, a
drenta.
E otro punto pa cual e reunion a ser yama tabata e
falta di airco den klasnan rond di Aruba. Tambe a
trata e problema cu docentenan di movecion y salud.
Tin cu ta traha den solo (merdia), otro no tin un
“overdekte” of un sala adecua cu bon ventilacion.
Un cantidad relativamente grandi di docente tabata
presente.
Durante e reunion diferente punto a bin dilanti.
Entre otro a trata e estado deplorable di cierto scol-
nan, e hecho cu algun ta bieu y mester di renobacion
completo di e sistema di coriente, e costonan pa cu
esakinan y tur loke lo mester tuma lugar prome cu
yega na airco pa tur local.
Tambe a papia di cuanto scol cu no tin airco y e
motibonan pa cual esaki ta necesario.

SIMAR a trece dilanti e parti di ley cu ta proteha e
empleado, y tambe e necesidad pa uni pa logra e meta.
E reunion a cera cu un comicion forma pa docentenan
di diferente tipo di enseñansa cu lo bay traha ariba
un “stappenplan”.
Riba termino corto lo cuminsa cu un accion di firma
cu lo inicia den e proximo dianan caba. E accion aki ta
pa colecta firma di tur Cabesante, Director, Manager
y Docente cu ta sostene e hecho cu tur klas mester
tin airco, y cu tur docente di movecion y salud mester
tin un espacio fresco pa eherce nan trabou.
E meta ta pa e documento aki ta cla na tempo pa ser
entrega hunto cu e plan di e comicion na e siguiente
minister di enseñansa.

SIMAR y tur esnan presente ta consciente cu un tra-
bou manera esaki lo costa pais Aruba hopi y lo tuma
su tempo, pero lo percura pa huntu cu su miembronan
para ariba e importancia, e derecho di e empleado y
e seguridad di tur esnan cu ta biba den scolnan.
Tambe lo percura p’e plan keda ehecuta y no bira un
plan cu lo tuma demasiado aña.
Un danki ta bay na tur esnan cu a tuma tempo pa
ta presente y na esnan cu a pone nan mes disponibel
pa forma parti di e comicion.
SIMAR lo percura pa tene tur hende debidamente
informa di e desaroyonan pa cu e topico aki.