Page 20 - AM211015

20 AWEMainta .com Diabierna, 15 October 2021

BONAIRE

Modifikashon importante di e Lei di Labamentu di Plaka i

Finansiamentu di Terorismo BES spliká durante seminario

Promé di yüli 2021, a formulá e Lei di Prevenshon di Labamentu di Plaka i Finansiamentu di Terorismo BES (Wwft
BES) mas kla. Riba 13 di òktober, durante un seminario di un dia, a para ketu riba e importansia di e reglanan
aki i kambionan mas importante. Gezaghèber Rijna a inougurá e dia, kaminda un grupo grandi di empresario i
representantenan di kompanianan tabata presente.
Un instrumento importante pa e prevenshon di labamentu di plaka i finansiamentu di terorismo na Boneiru, Sint
Eustatius i Saba (Hulanda Karibense), ta e Lei di prevenshon di Labamentu di Plaka i Finansiamentu di Terorismo
BES (Wwft BES). Ku Wwft BES, gobièrnu ke prevení i kombatí labamentu di plaka, finansiamentu di terorismo,
froude, korupshon i otro delitonan finansiero i ekonómiko.

Representantenan di De Nederlandse Bank, De Autoriteit Financiële Markten, Bureau Toezicht Wwft, Financial
Intelligence Unit Nederland(FIU-NL)) i e dekano di Orde van Advocaten van Den Haag ta na Boneiru e siman aki
pa splika e reglanan estrikto.
E reglanan den WWFT BES entre otro ta importante pa negoshantenan di material di konstrukshon, empresarionan
di propiedat inmóbil, bendedó di outo òf kompanianan ku ta duna servisio finansiero, manera banko i aseguradonan
di seguro di bida. E reglanan ta yuda prevení ku yudansa di òf via un di e partidonan, plaka kriminal ta drenta e
sistema finansiero òf ta finansiá terorismo.

Den su spich, Gezaghèber a pone énfasis riba e importansia pa kombatí labamentu di plaka i finansiamentu di
terorismo. Labamentu di plaka i finansiamentu di terorismo ta representá un peliger serio pa ekonomia di un pais
i por influensia e desaroyo ekonómiko. E falta di un régimen efisiente kontra labamentu di plaka por tin efektonan
negativo pa tantu institushonnan nashonal komo komersio internashonal.
Pa un ekonomia salú i próspero pa Hulanda Karibense, ta importante pa prevení i kombatí labamentu di plaka.
Mas informashon tokante e regla- i rekisitonan ku kompanianan na Boneiru mester kumpli kuné, por haña riba
wèpsait di e supervisornan involukrá i FIU-Nederland.

A tuma medida kontra kachó agresivo

KRALENDIJK - Den oranan di mainta riba djárason 13 di òktober un agente polisial a hañ’e obligá di los tiru riba
un kachó na momentu ku esaki a atake riba kaya. E kachó a sali for di den un kura di un kas situá na Kaya Hulanda
di kua e kura tabata habri.
E kachó tabatin un kadena na su garganta ainda for di kua por konkluí ku e tabata mara i a los. E agente polisial
a kana pasa banda di e kura di e kas despues di kua e kachó a sali kore su tras.

Den promé instante el a purba spanta e kachó. Esaki no a logra i e kachó a sigui bin riba dje. Pa prevení ku e kachó
aki lo a mordé, e agente polisial a hañ’e obligá di tira e kachó aki pa protehá nan mes.
Semanalmente notifikashon tokante kachó agresivo ku ta kana lòs ta drenta. E frekuensia i seriedat di e
notifikashon nan ta varia. Ta trata di notifikashon tokante entre otro kachó ku ta morde kabritu i galiña mata ku
konsekuensia finansiero pa tenedó di bestia, pero tambe kachó ku ta ataká siklista i shofùr di skuter lokual ta krea
situashonnan sumamente peligroso den tráfiko.

E kantidat di insidente kaminda en bèrdat kachó ta morde un persona i ku esaki mester di tratamentu médiko,
ta oumentando. KPCN ke hala atenshon di doñonan di kachó pa tene kachónan den kurá dor di sòru pa un kurá
stabil for di kua e kachónan no por sali i/òf pa mara e kachó. Esaki pa prevení tipo di situashonnan asin’aki.
Ta rekomendabel pa sosialisá un kachó. Un kachó mester di edukashon i treinen. Pa esaki tin fasilidatnan presente
na Boneiru. Abo komo doño ta responsabel p’e komportashon training di bo kachó.

Detenshon na Aeropuerto Flamingo na Boneiru

KRALENDIJK - Djamars 12 di òktober 2021, alrededor di 4.45 or di atardi, Aduana a detené un pasahero sospechá
di kontrabanda di droga na Aeropuerto Internashonal Flamingo.
Durante di un kòntròl rutinario di pasaheronan prosedente di Hulanda a selektá un pasahero maskulino pa un
kòntròl di Douana.
A resultá ku e pasahero aki tabata transportá droga den su ekipahe. Durante di e kòntròl e pasahero a purba huy,
pero Douana a logra detené pa importashon di droga. A konfiská e droga i a trasladá e, huntu ku e sospechoso, pa
Koninklijke Marechaussee ku lo ehekutá un investigashon penal.