Page 32 - MIN ON

16 AWEMainta Diaranson, 17 Februari 2016

E siman aki:

Mas cu 50
cabesante di scol
den programa di
“International
School Leadership”

TABATA na october 2015 cu a inicia cu e prome grupo

di cabesante y directornan di scol cu a sigui e curso di “International
School Leadership” den cual ta pone esnan cu ta encabesa un
scol hunto pa por empodera nan cu instrumentonan necesario pa
por cambia rumbo di nos enseñansa.
Ta trata aki di area di desaroyo profesional pa nos educadornan.

Hopi biaha e cursonan sa ta hopi general, pa gruponan mas grandi,
manera na october durante luna di enseñansa cu a brinda cantidad
di curso y tayernan riba tur tipo di tema of disciplina den enseñansa.
“Esaki ta hopi mas specifico p’esnan cu ta director, director
adhunto of cabesante di scolnan, cu manera ta conoci, tin
necesidadnan hopi mas specifico y mas enfoca riba cierto punto den
nos enseñansa compara cu cosnan mas general”, asina Minister
Michelle Hooyboer-Winklaar a duna di conoce durante un
entrevista despues di a atende apertura di e curso di International
School Leadership (I.S.L.)

A cuminsa aña pasa cu un grupo di profesional di Ontario Principals’
Council cu ta representa mas cu 5000 cabesante di scolnan na
Canada.
Nan ta brinda e cursonan aki na diferente parti di mundo. Nan
meta ta pa engrandece enseñansa rond mundo, pa cual Aruba sin
duda tambe kier ta parti di dje.
E grupo atendiendo e curso aworaki t’e prome grupo di october
aña pasa, cu awor ta siguiendo cu e resto di e modulenan y e di dos
grupo cu a cuminsa cu e prome curso. Na final di tur e 6 modulenan,
e cursista lo ricibi su certificado special.

Den un sala a yena 30 participante cu ta continuando cu e di dos
parti y den e otro sala un otro 30 docente cu ta apenas iniciando
e curso special aki.
For di e docentenan participando ta bisa cu e curso a cambia nan
perspectiva completamente, cosnan cu awor nan ta trahando riba
dje, plannan pa nan scolnan unda nan kier mira mehoracionnan, cu
awor ta traha hunto cu otro scolnan locual antes no tabata e caso.
E forma nobo di traha aki sin duda ta dunando bentaha, cu sin duda
a sali for di e programa aki.

“Nos ta hopi contento cu nan ta bek awe cu nos. E curso intensivo aki
lo sigui durante 4 dia largo y mi ta spera di scucha na final cu tur cos
a bay bon y cu e lidernan di nos scolnan a siña hopi”, asina Minister
Michelle Hooyboer-Winklaar a enfatisa.
E ta spera cu den transcurso di e aña aki ainda e cursonan lo continua,
pa prepara e cabesante di scolnan di Aruba mihor p’e retonan cu
tin awendia den enseñansa.