Page 25 - WEB
P. 25
Na 2016 e no tabata asina serio, pero ta sintiendo cu no sa si e problema ta keda cu WEB
ta uzando un fuel barata, cu no ta un low sulfur fuel, pa por kima y cu e ta haciendo un
daño riba e operacion di ASTEC.
Siman pasa barco a bay Corsou cu tur fruta y berdura, nan no por a caba di descarga,
pasobra tabata tin e problema di e smokebreak. Awe tabata mesun cos, for di 6’or di
mainta, e trahadonan ta para henter dia na banda di waf, pasobra nan no por saca ningun
container, pa motibo di e smokebreak. Personalmente Geerman a bin tuma e caso siman
pasa di e situacion eyriba y e situacion ta hopi erg. Tin hopi comprension pa e trahadonan
di ASTEC. E huma no ta nada bon. No por traha den dje. E ta corta bo rosea. Bo ta haya
un smaak masha marga den bo boca. E no ta bon. Kier bisa bon cla, como compania di
transporte, no tin nada contra di e trahadonan di ASTEC. Ta solidario cu e trahadonan di
ASTEC pa loke ta e situacion, pero riba haltura di Gobierno mester bin un solucion
rapido. Ta drentando den e high season di carga y awor aki caba ta wordo stroba den e
operacion diario. Tin miedo cu capitan di barco bolbe tuma un decision, los barco bay
Corsou bay descarga. Ata fruta y berdura ta diabierna atardi ta bolbe yega Aruba,
Supermercado ta bashi, cliente ta pone presion riba e companianan di transporte, e
companianan ta pone presion riba e drivernan, por pasa un accidente durante transporte,
pasobra ta hopi factor tin cu tuma na cuenta ora cu un barco ta laat. Aruba no ta manera
Aruba di antes. Tin hopi trafico y cada biaha cu clientenan ta exigi mas di e
companianan, ta exigi mas di e trahadonan. Unico cos cu sali for di esaki ta un accidente.
Esey ta loke ta lamenta. A bin pa un protesta y pa comunidad sa kico e companianan di
transporte ta haci pa loke ta e situacion. Nan no ta haciendo nada. A papia cu ASTEC. E
companianan di transporte tin hopi driver cu ta self employed. Nan tin nan mesun trekker
y ta hala pa hopi compania broker di carga y nan tambe ta sinti e efecto cu henter dia nan
no por traha. Ta urgi gobierno pa por bin un dialogo cu WEB pa busca un solucion rapido
prome cu e season halto di carga yega, y cu por perhudica e economia di Aruba.
