Page 88 - MIN VOS 9 APRIL 2016

SVB: Dialuna awo lo bay trata e ley di saneamento di e fondo
seguro di malesa den Parlamento

Friday, 08 April 2016 20:12
Comparti

SVB a wordo notifica cu dialuna awo den un reunion di Parlamento lo bay trata e cambionan di ley
necesario pa sanea e fondo di seguro di malesa.

Esaki bira e ora e ultimo parti di e saneamento di e fondonan cu ta bao administracion di SVB. Ta bon pa
para un rato keto na kico SVB a pasa door di dje e ultimo 15/16 aña. Na comienso di e decada pasa, tabata
bisto cu e fondo principal, e fondo mas grandi di AOV tabata den un situacion fastioso. E momento ey
SVB a trece na 2003 organisacion internacional di Labor, pa haci un estudio actuarial di e fondo. A base
di e rapport ey nan cu a sali na 2004/2005, a sali un discusion riba un nivel politico, riba reforma
necesario pa por garantisa e durabilidad financiero di e fondo aki. A tuma tempo pa a concientisa
comunidad y e actornan politico di e necesidad pa cambio y reforma pa por garantisa e fondo su
existencia y financiamento. Henter e proceso aki a tuma su tempo y ta mira cu na 2011 gobierno a
cuminsa tuma e decisionnan y na 2013 a completa e proceso di reforma pa e fondo di pensioen di AOV,
fondo di pensioen di biehes y asina ta mira tambe cu na 2014 y 2015 e fondo ta den e proceso di
recuperacion. Manera e proyeccionnan ta mustra pa e proximo añanan e fondo aki ta bay sali
definitivamente di su situacion financiero fastioso cu e tabata den na comienso di e decada aki, cual a
wordo premira caba pa e estudio actuarial na 2013. Paralelo cu e situacion financiero di e fondo di
pensioen di biehes, tambe e situacion financiero di e fondo di malesa tambe tabata exigi atencion pa por
a soluciona e problema aki. A tuma su tempo. Aña pasa, minister di salud publico, dr. Schwengle, a tuma
decisionnan determinante pa sanea e fondo aki. A base di esey a bin cu un plan pa sanea e fondo y awe ta
asina leu, ta para na bispo di e debate publico den parlamento pa aproba e reforma aki y si parlamento
aproba e reformanan cu a propone pa por sanea e situacion di e fondo di malesa, por bisa e ora cu lo cera
un ciclo den e bida di SVB como instituto manehando fondonan cu tabata tin problema financiero. Ta
bay ta cerando esey, e ciclo di e reformanan. E saneamento di mes di e fondo di seguro di malesa ta bay
dura 4 pa 5 aña. Pa 2019 of 2020 e fondo lo ta completamente sanea. E momento ey tambe SVB ta bay ta
pasando den e siguiente fase di su existencia como instituto.

http://www.24ora.com/local-mainmenu-5/107306-svb-dialuna-awo-lo-bay-trata-e-ley-di-saneamento-
di-e-fondo-seguro-di-malesa-den-parlamento