Page 62 - MIN ON_Neat

Terminacion di contrato di docentenan local na Colegio y trecemento di docentenan di
exterior ta cosnan entre otro cu pa gobierno no ta corecto

Monday, 01 May 2017 22:11
Comparti

Durante combersacion cu minister Michelle Hooyboer Winklaar a splica cu na diferente occasion a
comunica na dirigentenan di Colegio Arubano riba algun punto cu pa gobierno no ta na su lugar.
Awo recien a mira tambe un desaroyo unda cu tabata tin nan preocupacionnan pa no solamente e
maneho cu tabata wordo hiba na e scol, entre otro cu a wak cu e gerencia di e scol a termina contract di
varios docente, cu cada biaha cu bin cu docentenan cu ta bin for di exterior, ta costa fondo tambe, rond
di 40 mil florin pa cada docente cu ta bin, entre otro transportkosten, diferente costo cu ta algo atrobe
cu tin un impacto financiero y cu decisionnan asina aki ta wordo tuma simplemente a base di nan
rekisitonan y no ta consulta cu Gobierno, cu finalmente ta esun cu ta paga esaki. A base di diferente
carta cu a manda pa e fundacion y pa esnan cu ta nombra personanan cu ta den e fundacion, a mira cu a
retira of e presidente di e raad van bestuur a retira, y eynan a bin tambe diferente discusion cu por
ehempel entre otro bisdom, cu ta nombra e presidente. A sinta cu nan. A trece tur e preocupacionnan
aki padilanti y a vocifera tambe na e momento eynan cu algo cu no solamente Gobierno ta indica, pero
ta wak cu diferente instancia y pueblo en general ta bisa, e ta dificil pa compronde cu den 2017 lo por tin
un instancia cu ta depende 100% riba fondo di Gobierno, pero na un otro banda, Gobierno no tin un
zeggenschap den e fondonan aki of maneho den e bestuur, ni representacion den e directiva.
A wak cu diferente directiva si Gobierno a pone un persona of mas, pero den e caso aki a wak cu e
statutonan cu ta vigente pa e scol, no tabata tin espacio pa esey, of nunca no a wordo poni. A acerca e
momento eynan bisdom cu e peticion pa por repasa y pa por cambia y adapta e statutonan pa por duna
e representacion, duna Gobierno e ora ey un asiento pa simplemente duna tambe balor na no
solamente e co responsbilisacion cu mester bin, pero tambe na un otro banda cu hunto lo por tuma
decisionnan mas clave y mas concreto cu ta cuadra cu no solamente vision di e scol, pero tambe vision di
Gobierno pa enseñansa. Eynan ta wardando contesta di bisdom riba e peticion aki. A acerca CAD pa haci
un grondig onderzoek riba e parti financiero den e fundacion mes, pa sigura cu cualkier duda cu por tin
pa loke ta trata e transparencia pa loke ta trata e fondonan cu esey por wordo kita for di mesa y cu no
tin duda e ora como Gobierno tin tambe responsabilisa su mes pa e fondonan aki. Na un otro banda, ta
boga pa por sinta na e mesun mesa pa por tuma decisionnan cu ta afecta e calidad di enseñansa, afecta
futuro di hopi studiante y docentenan cu tambe a acerca Gobierno na varios ocasion cu nan
preocupacionnan. Esaki ta e momento unda cu ta wak cu e ta un oportunidad pa haci cambionan hopi
moderno y cu ta refleha precies loke ambos partido lo kier pa e scol y hunto e ora ey crea e scol cu tur
hende lo ta desea pa wak, pa un Colegio Arubano, e mandatario a splica finalmente.