Page 64 - MIN ON_Neat

Trayecto pa haya un otro rector pa Colegio Arubano no ta
facil

Monday, 01 May 2017 21:53
Comparti

Un tema cu nos a papia cu Minister Michelle Hooyboer-Winklaar, ta nombracion di un rector nobo. Sa
cu no tabata facil. Tabata cla pa nombra un persona, pero esaki no a concretisa.
Gobierno tambe tabata tin su exigencianan. Pero unda nos ta para awe. Ta mustra cu Colegio ta sin un
persona na timon.
Segun e minister, tabata un trayecto hopi largo cu tabata tin den e ultimo añanan pa no solamente
nombracion di un rector. A mira cu a nombra un rector den pasado, despues cu sr. Jossy Tromp a retira.
A mira cu a bin cu un rector cu no a resulta. Gobierno tambe tabata tin su dudanan y a comunica esaki na
varios ocasion, pero a yega na un momento unda e persona mes a hala atras y a bay bek Hulanda, unda
sigur na e momento eynan a comunica y vocifera cu no lo kier ripiti esaki, mirando cu loke e scol tin
mester, ta un persona cu ta trece e ora obviamente experiencia, pero tambe na un otro banda,
comprension pa nos cultura, comprension pa vision di Gobierno pa enseñansa y unda cu no lo kier copy
paste solamente kisas loke un rector di Hulanda lo por haci, pero sino un persona cu lo por compronde
precies unda kier hiba nos Colegio y no lo kier necesariamente, simplemente haci loke Hulanda ta haci.
Pa Gobierno ta importante pa e pas aan den nos sistema di enseñansa y nos cultura tambe.
A mira lamentablemente cu esey, e preocupacionnan no a wordo teni na cuenta y a mira cu SMOA a
bolbe sugeri y a postula e ora un candidato cu no solamente tambe tabata un persona cu lo a bin di
Hulanda, pero tambe cu a surpasa e grens di edad cu Gobierno por subsidia salario. A base di esey,
Gobierno a manda informa nan y esey un biaha mas a trece varios tension. A mira cu continuamente loke
Gobierno ta trece padilanti no ta wordo honra, of no ta wordo accepta y esey a crea diferente tension den
e ultimo añanan. Un biaha mas Gobierno ta mira su responsabilidad, no solamente pa e calidad di
enseñansa cu e scol ta ofrece y obviamente lo kier haci esaki na un calidad mas halto posibel, pero di otro
banda, e parti financiero, mirando cu solamente den e ultimo 4 añanan por a wak un fondo, un subsidio
di rond di 72 miyon florin, cu a bay na e scol, unda Gobierno ta responsabel pa duna un bista riba con
precies cada florin di esaki a wordo gasta, a wordo aloca, pasobra esaki ta fondonan di pueblo y esey ta
conta pa tur fondo cu ta pasa via un subsidie pa cualkier instancia.
Akinan un biaha mas ta unda a wak cu tin toch un discrepancia den pensamento cu aunke, apesar cu ta
subsidia, ta wordo poni na un distancia y no ta wordo envovli den diferente decision cu tin efectonan
hopi grandi, un impacto riba studiantenan, riba e maestro, docentenan y pa Gobierno esaki no ta
aceptabel.

http://www.24ora.com/index.php?option=com_content&view=article&id=121346:trayecto-pa-haya-un-
otro-rector-pa-colegio-arubano-no-ta-facil&catid=1:local&Itemid=5