Page 42 - KPA JULY 7

Homber di edad alcansa pa auto dilanti
edificio di Parlamento

Posted on 07/7/2015 8:24 am AST | Updated on 07/7/2015 8:25 am AST
ORANJESTAD - Diamars pa mas o menos 6' or di mainta, polis y ambulance a wordo manda cu
hopi urgencia dilanti di parlamento. E motibo tabata cu un auto a dal un persona y aparentemente
e persona alcansa, no tabata duna señal di bida. Na yegada polis a bin compronde cu enberdad
auto a dal un homber di edad, pero e tabata move y ta na bida. Un chauffeur di un Chevrolet
Blazer color di oro tabata biniendo di pariba, net na momento cu e homber a bay crusa. E lus di e
auto contrario a blind e chauffeur di e Blazer, cu a pone cu e no a mira e homber riba caminda y
a dal ‘e. Segun un guardia, ta di basta rato nan a yama polis caba cu e homber aki tabata keda
crusa e caminda bay bin, cu un tubo den su man. No ta conoci si e por tabata bou influencia.
Door di e impacto fuerte, e homber a kibra su pia rechts mal kibra y tabata sangra via boca.
Despues di e impacto e tabata grita yama diferente nomber di hende y no tabata para keto pa
personal di ambulance trat'e. Personal di ambulance a logra trate, y aparentemente nan lo a dune
algo cu despues el a calma. Cu hopi urgencia el a wordo transporta pa hospital. Specialista di
trafico tambe a bay na e sitio pa haci mas investigacion. E victima ta un persona di 90 aña di
edad, e conocido piscador Dama Colina. Tur mainta tempran e ta bay bishita e yatenan cu ta
mara na e pier ey dilanti. Pero awe niun hende no sa kico a pase.

‹›

