Page 45 - KPA JULY 7

Vlechtdor di cabey a maltrata turista y su yiu menor

Publication: Tuesday, 7 July 2015. Categoria: Policial

e mester a duna placa bek y haya advertencia pisa.

ORANJESTAD(AAN)– Na Moomba Beach tabata tin un bringamento y gritamento formal entre
dos muher diadomingo atardi. Relaciona cu esaki a despacha patruya di Strandpolitie.

Ora polis a yega dos testigo a acerca e patruya y a laga sa cu nan a mira tur cos cu a tuma lugar.

Un muher color scur cu ta vlecht cabey , un hamaikina, a cuminza ta bati un turista y grita, segun
e declaracion. E vlechtdo di cabey ademas a haci yiu muher di e turista dolor door di ranca su
cabey.

E testigonan a laga sa cu e muher tabata vlecht cabey di e mucha menor di edad. Ora cu e mama
a yega y a punta cuanto esaki lo costa, el a laga sa cu ta 80 dollar so e tin y esaki a haci cu e
muher di Jamaica a rabia masha, cuminza grita y despues ranca cabey di e mucha pa asina los tur
locual a vlecht caba.

E mama tambe a rabia y a cuminza cana bay cu su yiu pero e vlechtdo di cabey a sigui nan tras y
a cuminza dal e turista pa finalmente ranca e placa for di man di e bishitante y cana bay.

Otro testigonan tambe a bini cerca y a declara mescos. Un di nan a laga sa cu e turista ta na e
lugar ainda y despues di a papia cu e testigonan e patruya a bay cera e turista cu tabata cu su yiu
y familiarnan.

E mucha na e momento ey tabata den shock ainda. El a declara cu ora cu e hamaikina a tende cu
su mama tin solamente 80 dollar, e muher a cuminza ranca su cabey te cu el a haya dolor y
cuminza yora.

E mama a laga sa cu el a acerca e hamaikina ora cu el a ripara cu e muher tabata vlecht cabey di
su yiu y el a puntra e muher cuanto esey lo costa. Nan no por a yega na un acuerdo tocante e prijs
y e turista a ofrece 80 dollar y a laga sa cu ta esey so e tin.

E vlechtdor a rabia cuminza zundra y despues cuminza ranca cabey di e mucha pa por los loke a
vlecht. A sigui un intercambio di palabra y di eynan cos a sali for di man.

Testigonan a declara cu un dama cu ta bao di un di e cabana nan di Holiday Inn conoce e
hamaikina. E dma a wordo puntra pa yama e hamaikina na cellular, locual el a haci y polis a
papia cu e vlechtdor cu a bisa cu e a bolbe pa contra su banda di e historia.

Despues di un rato e muher cu polis a reconoce como bendedor di time-share a yega. ora a
puntr’e kico a pasa el a laga sa cu e turista no kier a pagu’e y como cu el a vlecht e cabey di e
mucha parcialmente caba el a exigi e placa cu e merece .