Page 68 - MIN.VOS MRT 24

Minister Alex Schwengle ta boga pa union pa progreso di deporte

 Mar 24th, 2015
 Deporte

Den presencia di representantenan di F.F.D, A.S.U, Lifida, C.O.A y Lotto di Aruba, Jose
“Buchi” Panama y otro lidernan den e ramo di deporte, a tuma luga siman pasa traspaso di e veld
di Yara. Ta trata aki di un veld di futbol cu a wordo renoba y poni bek na uzo y disponibel na e
comunidad di Savaneta y bisindario, pero tambe futbolista y teamnan di otro bario.

Minister di Salud y Deporte, dr. Alex Schwengle ta hopi contento cu e desaroyo positivo aki, no
solamente como e mandatario encarga cu deporte, pero como un persona procedente di Savaneta.
El a expresa cu e traspaso a marca un dia grandi pa deporte y algo hopi bunita pa su bario di
Savaneta cu semper a destaca den deporte y ta stima deporte.
A traha duro riba e veld, tin algun idea con pa sigui desaroy’e y awo ta sigui e proceso pa
combersa cu e teamnan di Savaneta pa mira kico ta nan deseonan. E mandatario a gradici Lotto
di Aruba pa e empeño pa traha duro pa hiba deporte dilanti. El a expresa cu e ta spera cu e
fondonan cu ta ricibi for di Lotto sigui aumenta y a menciona e deseo pa esaki bira cinco miyon
den futuro cercano.
“Nos por garantisa boso cu cada florin cu wordo produci extra na Lotto di Aruba ta bon uza den
deporte via di subsidie commissie, cu ta birando un fundacion”, asina Minister Schwengle a
subraya. El a encurasha un miho organisacion di deporte, unda cu ta pone orguyo un banda pa
habri porta pa colaboracion y asina uza cada florin optimalmente y den un forma mas
responsabel posibel.

E Minister a expresa cu el a nota esaki den funcionamento den e districto di Noord, unda cu dos
ekipo rival a dicidi di traha hunto den cierto areanan pa haci uzo maximo, mas efectivo y mas
eficiente di e fondonan disponibel. Minister Schwengle a menciona tambe e importancia di
“duna cuenta”, unda cu transparencia y eficiencia di parti di Gobierno y di tur organisacion
deportivo ta masha importancia. Cada un persona y ekipo envolvi mester duna di nan mes.