Page 54 - KPA

101 studiante di Polis a huramenta of

ricibi diploma

Posted on 08/22/2017 6:20 pm AST | Updated on 08/22/2017 7:57 pm AST

ORANJESTAD - Na Scol pa Polis a tuma luga huramentacion di un klas, di cual e
studiantenan di Polis ta den e mita di nan estudio. E grupo di studiante aki ta subi caya y
nan tin mester di nan autoridad y esey ta e motibo cu nan a huramenta dilanti di Minister
di Husticia, mr. drs. Arthur Dowers y Altocomisario di Cuerpo Policial, mr. Adolfo
“Dolfi” Richardson. Tambe a tuma luga entregamento di diploma na 60 studiante
policial.

Hefe di academia Policial di Aruba, mr. Drs. Jeannette Richardson-Baars a splica cu un
total di 4 klas a ricibi nan diploma, di cual 1 klas a yega nan di 2 aña di e opleiding y
esaki a pone cu nan a haya diploma di nivel 3. E klas aki lo bay den e siguiente fase cu ta
nivel 4. Tambe tabatin 1 klas cu a caba ful e fase di MBO y esaki ta haci cu nan no lo
mester bay scol bek, pero traha riba caya. Loke cu tabata nobo y importante durante e
ceremonia ta cu tabatin 2 klas di MKO, cual ta Midden Kader Opleiding.

E estudio di MKO ta sigui despues di MBO. Esaki ta cu ora nan traha tanto aña den
practica, nan mag di sigui den MKO y asina nan por siña tur tool cu nan mester di dje pa
asina bira un “leiding gever”. Despues cu e diploma den man, nan por solicita pa un
funcion di “hoofd agent” cu ta guia Polisnan riba caya. Mas di 100 ta esunnan cu a ricibi
nan diploma of huramenta.