Page 19 - ARUBA BANK

Gobierno a cera contrato cu Muscle and Lungs pa desaroya
edificio di ex Esso Lagoen

Wednesday, 07 June 2017 21:30
Comparti

E edificio di Ex Esso Lagoen, ta un edificio cu tur hende ta corda di ta pasa eynan pa yena nan gasolin
den pasado. Despues di varios aña cu el a para bashi, e edificio a wordo cumpra y inversionnan a wordo
haci, pa e tin un funcion nobo.
Minister Benny Sevinger, a splica cu un ekipo di inversionista local, lo bay desaroya e edificio aki den un
edificio cu lo bay trece sigur den e bario di klip un miho bida saludabel pa e ciudadanonan.
Di parti di ministerio di Infrastructura, na momento cu prome minister a acerca nan riba e edificio aki,
tabata husto pa por a tuma e decisionnan pa cera un contract cu e compania Muscle and Lungs, pa nan
tuma over.

Actualmente ta bezig cu renobacion di Oranjestad. Tur edificio di Gobierno ta den picture y tin un plan
kico ta bay haci cu nan. A renoba e edificio unda Bestuurskantoor ta, Watertoren. A renoba edificio di
Dimas, ta bay cuminsa cu ex-DOW, JFK School. Tur edificio di Gobierno tin un plan pakico tin e edificio
aki of ta bend’e, si e edificio no ta sirbi e proposito mas di Gobierno. Den e caso aki, e edificio di Ex Esso
Lagoen, ta un di nan, na momento cu prome minister a bin cu e idea, hunto cu propietarionan di Muscle
and Lungs pa haci esaki un gym, el a cay perfecto riba e lista di Gobierno di edificio cu mester wordo
renoba, hunto cu e proyecto cu ta rond di dje tambe.

Tin idea pa drecha Lagoen, conect’e na Linear Park, y conecta Linear Park na e hotelnan. E ta pas den
henter e masterplan di Oranjestad pa loke ta trata e edificionan y desaroyo di infrastructura di nos pais.
E ministerio di Infrastructura ta yama un bon bini na e propietarionan y alabes ta felicita prome minister
cu un otro edificio cu ta bay wordo renoba, cu ta un otro parti di e puzzel di e total renobacion di nos
centro di ciudad.
As is

E edificio lo wordo entrega “As Is”. Segun minister Sevinger, e grupo lo renoba e edificio y den e contract
cu nan ta cera cu nan riba pago di huur, lo yega na un prijs, unda cu nan por saca e inversion di loke nan
a drecha. No ta bay duna nan un huur di dos aña di loke nan no por saca di loke nan a inverti den dje. Tin
diferente cos cu Gobierno por ehempel e kiosconan, a traha y ta huur, esaki ta full fledge price. Pero den e
caso aki e doñonan mes lo inverti y e prijs lo ta hopi mas abao.
Tin un lista di edificio di Gobierno y ta haci un analisis si e edificio aki ta bal la pena renoba pa Gobierno
haci su propio uzo of e ta bal la pena pa nan bende e edificio of tin interes pa huur e edificio aki di
Gobierno. A rais di e lista eynan, ta tuma e decisionnan.

Por ehempel DOW ta bay wordo pasa over pa ATA, ATA mes ta bay renob’e, e ta bay bira nan oficina
eynan. JFK a wordo tuma pa AIB, pero Gobierno lo bay huur’e como centro di enseñansa cu ta bay bin.