Page 12 - Min Vos 17SEPT,2015

8.300 caso confirma di Diabetes tin registra na Aruba

Publication: Thursday, 17 September 2015. Categoria: General
Dr. Maritza Ordoñez di DESPA:

ORANJESTAD (AAN) –Docter Martiza Ordoñez a elabora riba e tema di Diabetes, den su
charla cu Artsenassistent Aruba a organiza, pa publico en general den Centro di Bario Playa
Pabao, diamars anochi.
Dra. Ordoñez a cuminza bisando cu diabetes ta un malesa conoci cu tur hende sa sikiera un tiki
di dje. E ta un malesa cronico, kiermen cu no tin cura pe.
Diabetes tin di haber cu falta di insuline of mucho poco insulina den curpa.
El a splica cu insulina ta wordo produci pa e pancreas. Esaki ta un glandula chikito cu ta rondona
di e stoma, tripa delega, higra, bazo, y galblaas.
E dama a menciona cu e celnan beta di pancreas ta esnan cu ta produci insulina. E insulina ta
traha hunto cu e glucose pa hiba nos sucu den nos sanger.
Tin dos sorto di Diabetes: tipo 1 y tipo 2. Tipo 1 ta ora e persona tin falta di insulina y e ta
presenta den mucha y hende jong y e ta un malesa hereditario. Den e caso aki e pacient ta
depende di insulina como tratamento.
E tipo 2 tin mas di haber cu e estilo di bida di e persona. E ta relaciona cu mal habito di
nutricion, come mucho vet, consumi hopi sucu, tin sobrepeso, no haci movecion, of cu e sistema
di defensa di e curpa ta hopi abao und cu e persona constantemente ta bira malo. Personanan cu a
haya hopi malesa den nan bida por keda predispone pa despues bira diabetico.