Page 13 - Min Vos 17SEPT,2015

Tambe malesa di sucu por ta temporal, por ehemplo durante embarazo. E motibo di esaki ta cu
durante e embarazo tin un par di hormone cu ta stroba e paso di e insulina.

Entre otro aspectonan cu e docter a menciona, el a indica cu e maluso di medicamento por
desemboca den diabetes. Hopi biaha por ripara cu tin hende cu pa tur cos ta uza remedi. Asina e
docter a subraya. El a haci enfasis cu pa tuma remedi mester tin hopi cuidao.

Por ehemplo pa malesanan viral no mester uza hopi remedi, vooral antibiotica. E ta ripara cu na
Aruba hende ta uza antibiotica sin discriminacion.

Tambe tin dos aspecto hopi importante den e desaroyo di diabetes: falta di movecion y
sobrepeso, y na Aruba tin hopi hende cu peso di mas. No obstante, e ta contento di mira un
cambio den e cultura pasobra riba Linear Park por observa hopi hende ta cana, for di hende
grandi te mucha.

Dra. Ordoñez a señala cu segun Organizacion Mundial di Salud (OMS) na henter mundo tin 347
miyon di hende diabetico. Na Aruba nos te cu 2014 tabata tin 7.800 pacient cu malesa di sucu.
Esaki ta nifica cu di cada cinco persona dos ta diabetico. El a subraya cu lo mas tristo ta cu e
edadnan ta entre 20 cu 69 aña, kiermen den edadnan productivo. E datonan actual a cambia.
Aworaki Aruba 500 diabetico mas a bin acerca, ya cu e estadisticamente nos tin 8.300 caso
registra, segun datonan suministra pa AZV cu DESPA ta procesa.

E porcentahe di Diabetes 2 ta mas halto cu di Diabetes 1.

E docter a reitera cu un persona cu tin diabetes tipo 1 su curpa no ta procesa insulina at all y e ta
bira pa semper insulina dependiente.

Diabetes 2 ta wordo trata cu medicamento, riba locual e docter no a drenta den detaye, pasobra e
kier a subraya cu esaki, mas tanto, ta debi na nos style di bida siendo cu por preveni door di haci
movecion y come saludable.

Tambe ta asina cu ora un persona cu tin Diabetes 2 su sucu ta subi na nivelnan hopi halto sin cu
por baha esaki, e tambe lo por bira dependiente di insulina aunke e ta keda un pacient cu
Diabetes 2.

http://www.diario.aw/2015/09/8-300-caso-confirma-di-diabetes-tin-registra-na-aruba/