Page 16 - AM211030

16 AWEMainta .com Diasabra, 30 October 2021

UN SNECHI DI PALABRA DI DIOS

XXXI DIADOMINGO DEN AÑA 31.10.21 #335

I lectura: Deut 6, 2-6

Salmo 18

II lectura: Heb 7, 23-28

Evangelio: Mc 12, 28-34

Den e tempo aya un cierto doctor di ley a bin cerca Hesus y puntr’E: “Cual mandamento ta e mandamento di mas
importante?” Hesus a contest’e: “E mandamento di mas importante ta: ‘Scucha, Israel! Señor, nos Dios, so ta
Dios. Stima Señor, bo Dios, di henter bo mente, y cu tur bo forsa.’ E di dos mandamento di mas importante: ‘Stima
bo prohimo manera bo ta stima bo mes.’ No tin ningun otro mandamento cu ta mas importante cu esakinan.” E
doctor di ley a bisa Hesus: “Bon, bon, Maestro! Berdad, ta un Dios so tin y no tin ningun otro Dios cu no t’E so. Ta
asina cu hende mester stima Dios di henter su curason, cu henter su comprendemento y cu tur su forsa. Tambe e
mester stima su prohimo manera e ta stima su mes. E cosnan ey ta mucho mas importane cu sacrificio di candela
y otro sacrificio.” Hesus a mira cu e doctor di ley a papia su sabiduria, p’esey El a bis’e: “Bo no ta leu fo’i reino di
Dios.” Ningun hende no a tribi puntra Hesus nada mas.

Palabra di Señor.

MENSAHE

“Cual mandamento ta e mandamento di mas importante?”

E pregunta aki tin su base, pasobra hudiunan a conoce mas cu 600 punto di ley. Toch probablemente e hoben di
evangelio ta haci e pregunta aki pa selecciona puntonan di ley na esnan mas y menos importante y di e manera aki
limita su responsabilidad. Pero Hesus no a haci e division aki. E ta dividi nan na esnan cu ta referi na Dios y otro
pa prohimo, pero E ta afirma cu tur dos ta mes importante. Dios su mandamento ta mandamento di AMOR. Esun
cu ta stima no tin urgencia pa haci distincion entre mandamentonan. Si nos ta stima Dios di henter nos curason,
cu tur nos forsa y sinti, manera Hesus ta pidi, nos lo no ignora ningun punto di ley.

Prome cu Hesus ta menciona algun mandamento E ta bisa: SCUCHA.
- Nos no por cumpli cu ningun di Dios Su mandamentonan si nos no ta cumpli cu esun prome: SCUCHA.
- Scucha Dios den tur instante y circunstancia di nos bida.
Esun cu ta stima, na prome luga e sa scucha y obedece.
Asina tambe nos amor pa prohimo ta keda expresa y proba den nos manera di scucha otro y cumpli cune.

Amor ta scucha, obediencia y sirbishi.

Ley di Dios no por ta pa nos djis un les di teoria, di estudio filosofico di normanan di bida.

Ley di Dios no por keda solamente den nos mente, e mester ta den nos curason.

Kisas e hoben di evangelio tabata kier haya elogio pa su sabiduria y disponibilidad pa cumpli cu ley di Dios, pero
Hesus ta bis’e solamemte: “Bo no ta leu fo’i reino di Dios.”

No ta suficiente pa nos conoce e mandamentonan di Dios y nan balor. Loke ta importante ta pa nos STIMA Dios y
nos prohimo. Ley di Dios ta ley di amor.

ORACION

Danki Señor pa Bo amor!!!

PROPOSITO

Mustra mas afecto y cariño na hende cu ta rondona bo.