Page 12 - AM211104

12 AWEMainta .com Diahuebs, 04 November 2021

Lanta mucha consciente pa yuda

conserva nos naturalesa y mundo

E mihor manera pa siña bo yiu y famia pa reduci, re-usa, y recicla, ta ora bo mes ta duna e bon ehempel: mustra

cu bo ta percura y respeta nos medio ambiente. Aki ta sigui algun sugerencia cu bo por purba como famia:

1. Siña bo yiu respeta naturalesa
Esaki por tuma lugar den bo cura di cas. Yuda bo yiu planta un mata, traha un hofi, pone baki cu cuminda pa parha,
un baki pa nan baña, traha cas di parha, etc. Diariamente nan por yuda haci e bakinan limpi y bolbe yena cuminda
y pone awa limpi. Por planea pa den vakantie p.e. bay campa, haci caminata, bay parke di animal, of bay lama.
Esakinan por yuda bo pa combersa cu bo yiu tocante matanan y animalnan y e importancia pa cuida nan.

1. Recicla
Esaki ta facil pa haci. Haya sa na cua lugar bo mester hiba carton y papel bieu, boter y pochi di glas bashi. Bo yiunan
por yuda door di pone e materialnan aki na un lugar specifico, p.e. un caha of hemchi. Tambe haya sa loke bo por
haci cu boter, bleki bashi. Laga creatividad guia boso.

1. Bebe awa
Awa den boter ta caro y kisas no ta smaak mas mihor cu esun di kranchi. E no ta mas limpi of mas safe cu nos awa
di kranchi. Hopi biaha ora nan ta bashi e boternan di awa (y tambe di otro likido pa bebe) ta resulta riba dump. Pues
por purba mas tanto posibel pa cana cu bo propio boter rond cu ta re-usabel.

1. Ora di haci limpi
Tin varios producto natural cu por remplasa productonan comercial di haci limpi y cu ta menos peligroso. Algun
ehempel ta: baking soda y binager pa haci forno limpi, pa habri drain verstopt, y pa kita mancha.

1. Duna un man
Duna un man ora tin accion di limpiesa den comunidad. Tambe bo por tuma initiativa pa organisa un dia di limpiesa
den becindario di scol di bo yiu of rond di bo cas.

1. Yuda mucha pensa “berde”
Bo por encurasha bo yiunan pa den nan actividad di tur dia busca manera pa limita gastamento di cos, rebaha uzo di
coriente, evita cumpra cosnan cu no ta necesario, y re-usa articulonan cu nan tin caba. Aki ta sigi algun ehempel:
• Conserva energia
Corda bo yiunan pa paga luz ora no mester di nan, paga computer ora e no ta den uzo, mesun cos ta conta pa
television. No habri Frigidaire, y keda cu e porta habri y para wak aden.
• Remplasa bombillo

Pone bombillo fluorescent na lugar di esun tradicional. Nan ta dura mas largo y ta uza menos energia.
• Re-usa y re-carga
Ta consehabel pa cumpra bateria cu bo por re-carga pa e aparatonan electronico di bo yiu, y esunnan di bo mes.
Siña nan con pa cuida y re-carga nan. Asina ta crea menos sushi y metalnan toxico cu ta bay dump.
• Haci donacion
Pidi bo yiunan pa colecta co’i hunga, buki, paña y otro articulo cu nan no ta uza mas, pa duna otro hende of
instancianan. Laga nan bay cu bo ora bo ta bay entrega esakinan. Nan por mira con e instancianan aki ta uza e

donacion pa yuda hende.

Esakinan ta algun idea. Reta bo yiunan pa bin cu mas idea pa nan por pensa “berde”. P.e. por print menos papel ora traha tarea den grupo
pa scol of baha informacion for di internet? Of bo yiu di 12 aña por baña menos largo di loke e ta haciendo awor? Bo por yuda bo yiunan
pensa riba esfuersonan cu nan ta haci cu ta afecta e mundo cu nan ta biba aden. E cambionan chikito ta haci un diferencia grandi.

Fuente: “Raising earth-friendly kids” –Education.Com

Pa informacion of pregunta por acerca Fundacion Pa Nos Muchanan - Cumana 2

Tel: 5834247/5880856 – Whatsapp: 6998900

E-mail: info@fpnm.aw - Website: www.fpnm.aw