Page 7 - AM211104

Diahuebs, 04 November 2021 AWEMainta.com 7

Danki p’e añanan di lealtad y contribucion na cuido di pashent

HOH cu despedida di ocho colega ehemplar

Recientemente Dr. Horacio E. Oduber Hospital a
tene un despedida pa bisa ayo na algun colega cu
a bay of lo bay pronto pa gosa di nan pension bon
mereci. Den un ambiente ameno hunto cu famia y
team di maneho di Hospital a gradici cada colega
pa nan tempo dedica na e institucion. Nan ta un
grupo hopi pega na Hospital, cu pa nan HOH ta
mane nan di dos cas, unda a dedica hopi aña di
nan bida cu amor pe pashent y coleganan.

A dispidi di Osrick Toppenberg, un persona dinamico
y un cara hopi conoci semper cu un smile, ta traha
den cushina di Hospital. Leila Croes –Kelly cu ta labora
na departamento di Finansas semper profesional y
ta mira tur detaye.

Diana Celaire, cu curason grandi pa su pashentnan
a cuminsa traha na aña 1975 y ta labora como
Ziekenverzorgende na departamento di Niet Snijdend
4. Tambe a tuma despedida di Francis Escalona- van
Klaveren, Verpleegkundige Geriatrie cu semper ta
tuma iniciativa y ta dedica na su pashentnan.

Otro coleganan cu ta bay disfruta di su pension ta
Olga Figaroa- Arenas, pues un colega cariñoso cu a
dedica su tempo na nos departamento di Voeding.
Nelson Croes, tambe un cara conoci ya cu e la
traha como cahero na Hospital. Ela cuminsa na aña
1974 cu hopi amor y lealtad pa su trabou y semper
dispuesto pa yuda coleganan.
Filomena Tromp – Semeleer adedica desde aña
1972 na departamento di Voeding unda cu e ta e
persona central percurando pa e sistema drey p’e
cuminda pa pashent.

Marcelino (Lino) Lopez, un persona hopi servicial y
dinamico di departamento di Receptie cu ta labora
desde 2011 na Hospital.

E coleganan aki a coopera y a keda traha despues
di nan edad pa baha cu pensioen na Hospital. Algun
di nan tin casi 50 aña trahando na Hospital y algun
a bay y a drenta servicio bek despues. Aworaki sigur
nan lo drenta un etapa nobo di nan bida unda lo
bay disfruta di nan pensioen bon mereci. Hospital
ta gradici cada un pa nan tremendo empeño,
cooperacion y dedicacion na Hospital. Masha danki
di tur colega di HOH!