Page 41 - AWM 26AUG2017

Apreciabel conciudadano,

Cu hopi orguyo mi ta comparti cu bo persona e vision di Pueblo Orguyuso Respeta, POR.

Un vision cu a wordo crea for di un anhelo pa transforma Aruba den e pais na unda bienestar
ta uno real y pa nos tur. Un Aruba na unda pueblo no solamente kier haya di come pero kier
tambe tin e liberdad di siña pisca. Un Aruba na unda cada ciudadano ta doño di su propio
destino y na unda derecho constitutional no ta un fabor.

Un Aruba na unda pragmatisimo no mester competi cu ideologia di solamente algun persona.
Ideologia hamas y nunca por para riba bienestar di un pueblo. Laga nos semper corda esaki.
Nos ta un team di profesional cu a bin hunto for di diferente angulo di bida cu un meta
comun, esta; traha incansablemente pa Aruba y su hendenan. Nos programa, cu ta carga
e nomber ‘ Vision ’17-’21 Hunto Nos POR ‘, ta contene puntonan di atencion y prioridad cu
aboso, nos hendenan a presenta y a comparti cu nos. Despues e tres lunanan cu nos a sinta
cu diferente instancia y grupo den comunidad, como tambe a base di e miles di mensahenan
ricibi via rednan social, nos a bin na e conclusion cu pueblo no solamente kier un voz, pero
un voz cu berdaderamente ta wordo scucha. Pa es motibo Vision 17-21 Hunto Nos Por, ta uno
di pueblo y pa pueblo. Hunto nos lo logra!

Mi kier tuma e responsabilidad como lider di partido y enfatisa cu e tempo cu nos tin nos
dilanti no ta bay ta uno facil. Tin retonan cu nos lo mester enfrenta y nos mester realisa
cu e unico forma pa surpasa e retonan aki ta a base di un asercamento autocritco, un plan
concreto y accionan realisabel.

Pa e motibo aki, nos vision ta,kibra cu e tradicion politico. Nos kier papia menos y haci mas.
Nos kier ta inclusivo y habri, no solamente riba papel, pero cu echo Nos kier duna bo un
trato igual, respetando bo derecho di kier ta ken bo ta. Nos kier pa abo y cada cuidadano cu ta
biba riba e pida baranca aki ta e ganador absoluto di nos accionan.

Dia 22 di september 2017 lo ta un dia historico riba cua hunto cada un di nos por tuma e
responsabilidad di ta doño di nos mesun destino. Dia 22 di september abo por dicidi pa siña
pisca of djis haya di come. Hunto cu E Forsa Nobo, nos lo guia e pais riba e rumbo di progreso
cu lo por wordo sinti den tur hogar. Bienestar berdadero y pa tur hende!

E Futuro di nos isla ta den bo man, nos ta confia den bo sosten… awo y despues di 22 di
september 2017. Hunto Nos POR!

Balornan humano semper mester prevalece riba ideologia.

Otmar E. Oduber B. Sc.
Lider di partido Pueblo Orguyoso Respeta (POR)

2