Page 45 - AWM 26AUG2017

Historia politico di nos pais a demostra cu union ta haci forsa. Cu fundacion di e plataforma
politico, E Forsa Nobo, a crea un oportunidad pa uni bou di un solo dak tur esnan cu ta
convenci cu mester bin cambionan fundamental den politica, gobernacion y maneho publico
di nos pais y ta dispuesto tambe pa contribui na esaki. Di e forma aki ta sigura cu nos oferta
di transformacion lo conta cu sosten amplio den nos comunidad durante proximo eleccion, pa
asina nos por haya un mandato fuerte di e mesun comunidad aki pa den su nomber y interes
cumpli cu nos compromiso pa cambia fundamentalmente e rumbo di nos pais.

Loke ta haci nos diferente ta cu pa nos partido cambio tin un nificacion profundo y
transcendental. Nos partido a wordo funda cu e meta pa logra cambionan fundamental y
duradero den tur aspecto di nos sociedad. Pues cambionan cu ta necesario pa hiba nos pais
den e siguiente nivel di desaroyo y realisa tur su potencial.

Den e programa aki nos ta elabora y splica e cambionan cu POR ta para pe y tambe con nos ta
bay logra esakinan den e siguiente periodo di gobernacion.

“ VOTA PA UN MIHO ARUBA ”

MESTER POR

Lansa un plataforma politico nobo den un arena tradicional na Aruba sigur no ta algo facil.
E ta rekeri curashi y determinacion, forsa di famia, confiansa den abo como ciudadano y fe
eterno den nos Creador.

Eleccion venidero no ta bay ta un eleccion manera e otronan cu nos a conoce desde Status
Aparte. E aña aki pa prome biaha como votador bo persona ta bay tin e opcion pa scoge pa un
cambio, no cambio di e partido den gobierno sino cambio den e rumbo y desaroyo di nos pais.
Tur generacion, aunke cu nan diferencianan, tin un meta comun, esta pa hunto construi y
laga atras un miho pais cu nan a hereda.

Cu bo sosten, cu bo curashi y man na obra nos lo logra esaki. Hunto nos lo logra. Dia 22 di
september proximo enberdad nos deseo ta pa bo deposita bo confiansa den nos partido, pero
mas importante cu esaki, nos deseo ta pa bo vota pa un miho Aruba.

“ NOS SOCIEDAD A BIRA MAS CONSCIENTE ”

6