Page 48 - AWM 26AUG2017

TRANSFORMACION

DI NOS PAIS DEN

UN MIHO ARUBA

Loke POR ta ofrece nos comunidad ta e transformacion pa un miho Aruba. Un Aruba unda
e hende y su derechonan, su bienestar, su progreso y su prosperidad ta poni central y unda
tur hende ta comparti e frutonan di desaroyo. Un Aruba unda tur districto y bario ta conoce
adelanto y prosperidad. Un Aruba uni y harmonioso. Un Aruba unda ningun hende ta wordo
discrimina of privilegia. Un Aruba basa riba igualdad y oportunidadnan igual.

Un Aruba unda e ciudadano ta consciente, critico y participativo. Un Aruba cu un democracia
bibo y un parlamento efectivo y eficiente hibando debatenenan di nivel y al caso, y asina
cumpli debidamente cu su tarea di controla gobierno. Un Aruba cu ta conta cu un gobierno cu
ta maneha nos fondonan publico na un forma responsabel y cu ta integro y transparente, cu
bon gobernacion y un aparato gubernamental cu ta productivo, eficiente y ta brinda servicio
di calidad halto. Un Aruba unda e ciudadano por biba trankil, sin temor di bira victima di
criminalidad.

Un Aruba cu un enseñansa gratis y di calidad halto. Un Aruba unda e pueblo ta practica
deporte y ta biba saludabel y por conta tambe cu un nivel halto di calidad y servicio di nos
sistema di salubridad. Un Aruba cu ta orguyoso di su herencia cultural. Un Aruba cu ta
mira e importancia di un desaroyo sostenibel y ta duna contenido real na proteccion di nos
naturalesa y medio ambiente. Un Aruba cu un economia diversifica cu ta genera empleo di
calidad pa entre otro nos yiunan di tera cu a bay studia den exterior y ta desea di bolbe nos
pais pa contribui na desaroyo di nos dushi pida baranca. Un Aruba cu ta wordo respeta den
Reino y mundo henter. Pues, un Aruba transforma unda tur ciudadano ta progresa y cu un
calidad halto di politica, gobernacion y maneho publico, di cual nos tur por ta orguyoso. Cu
otro palabra: un miho Aruba pa un y tur!

“ NOS TA BAY EHECUTA NOS PROGRAMA INTEGRALMENTE ”

9