Page 29 - ARUBA BANK

Benny Sevinger: Miles y miles ta haci uso di MFA esey kier
men cu e ta funciona y a haya su luga den comunidad

Monday, 03 April 2017 21:52
Comparti

Minister encarga cu infrastructura a firma, den nomber di Gobierno di Aruba, e contrato cu contratista
pa duna inicio na e construccion di MFA Santa Cruz. Sr. Sevinger a describi e momento como uno hopi
special y cu tabata warda ansioso riba dje.
El a sigui splica cu, mirando e exito cu a conoce na MFA Noord y MFA Paradera, Gabinete Mike Eman II
kier mira Facilidad Multifuncional di Savaneta, Santa Cruz, San Nicolas y Dakota tambe bira un realidad,
lo mas pronto posibel. Danki na e trabou dedica di tur stakeholder, cada bes ta mas cerca di e meta.
E idea di MFA ta uno cu ta bin directamente di Minister President Mike Eman, kende ta kere firmemente
cu servicio publico mester ta mas accesibel y mas agradabel pa e ciudadano den su mesun bario. For di
momento cu a asumi mando, a haci e sondeonan necesario den cada districto y a mira con e concepto aki
ta funciona exitosamente na Hulanda. Como cu ta algo completamente nobo pa nos isla, a tuma su tempo
pa hinca den otro, pero awo ta mira con bon nan a keda acepta na Noord y Paradera caminda e facilidad
ta den uso caba pa algun tempo.
Minister Sevinger bou di kende e supervision di e construccion ta cay pa medio di Departamento di
Obranan Publico, a bisa cu basa riba e bon experiencia di MFA Paradera, Gobierno ta contento di firma
cu e compania local BIC Aruba N.V. pa construccion di MFA Santa Cruz. E contrato ta specifica un
periodo di 220 dia di trabou, cual e titular di Infrastructura tin confianza cu lo cumpli cune si tur cos bay
manera planea, mescos cu e presupuesto di e proyecto.
Por ultimo, Minister Sevinger a felicita Stichting Onroerend Goed Aruba (SOGA) representa pa Sr. John
Hodgson, Aruban Investment Bank, BIC Aruba N.V., e Oficina di Maneho di MFA y naturalmente e
ciudadanonan di Santa Cruz cu pronto tambe lo goza di tur e beneficionan di e Facilidad Multifuncional.
“Miles y miles ta haci uso di e MFAnan; esey kier men cu e ta funciona. Tambe e parti social atardi, nos ta
haya bon recomendacion di e comunidad cu ta haci uso di esaki, dus e MFA a haya su luga den
comunidad,” Minister Sevinger a indica y na Santa Cruz lo ta mescos. “Ban firma e contract aki pa nos
cuminsa!”
Despues di Santa Cruz, e siguiente MFA pa keda concreta lo ta esun di San Nicolas y consecuentemente
Dakota cu ta esun mas reciente riba e lista y dunando oido asina na e peticion di e bario cu a crece hopi
den ultimo decadanan y tin mester di su propio oficina di servicionan publico.