Page 31 - ARUBA BANK

Gobierno a firma pa duna inicio na construccion di MFA
Santa Cruz

Monday, 03 April 2017 22:12
Comparti

E siman cu a pasa den sala di Conseho di Minister, a tuma luga firma di acuerdo pa construccion di MFA
Santa Cruz.
Di e manera aki Gabinete Mike Eman II ta tuma un stap mas leu pa brinda un miho calidad di servicio
publico den seno di cada districto. E Facilidad Multifuncional di Santa Cruz, ta bira e di cuater despues di
Noord, Paradera y Savaneta. Ta keda pendiente riba lista MFA San Nicolas y Dakota.

E acuerdo aki a keda firma dor di Sr. John Hodgson den nomber di Stichting Onroerend Goed Aruba
(SOGA), Minister di Infrastructura Benny Sevinger y director di BIC, Anthony Thiel. Na e ocasion tambe
tabata presente representante di Departamento di Obranan Publico (DOW) y Aruba Investment Bank
(AIB), como tambe di Oficina di Maneho di MFA.
Minister Sevinger a expresa su satisfaccion pa cu su firma duna inicio na construccion di otro MFA pa
pueblo di Aruba. Despues di apertura di MFA Noord y MFA Paradera, a registra un aceptacion grandi di
parti di ciudadanonan cu ta haci uso di e facilidad. MFAnan ta un iniciativa di Prome Minister Mike
Eman pa reemplasa e Oficinanan Auxiliar di Gobierno den districto cu a bira hopi chikito pa nos
poblacion y, na mesun momento, ofrece un variedad mas amplio di servicio.
E titular di infrastructura a indica cu e deseo tabataa pa a cuminsa hopi prome cu e construccion di MFA
Santa Cruz, pero tabata un reto pa e ekipo pa haya un tereno adecua. Finalmente a acorda riba un tereno
banda di e oficina actual di rijbewijs.
Mescos cu otro MFAnan, e edificio di dos nivel, ta destina como sede pa oficina, personal y servicionan di
Oficina Auxiliar di Gobierno (Hulpbestuurskantoor), ademas di otro departamento publico y oficina
priva. Tambe e Facilidad Multifuncional lo conta cu espacio pa reunion, biblioteca y cafetaria, entre otro.
Destaho Publico pa construccion a ser gana pa BIC Aruba N.V. cu a construi MFA Paradera tambe na
satisfaccion di Gobierno, segun Minister Sevinger.
Ta spera cu e ceremonia di ‘ground breaking’ lo ta den un par di siman despues cu haci e trabounan di
preparacion necesario. BIC a compromete su mes di keda cla y entrega e edificio den un termino di 220
dia, loke ta nifica e ultimo trimester di 2017.