Page 4 - ENNIA OCT 16

Accidentenan den trafico ta causa mas daño fisico cu crimennan den nos
comunidad

Publication: Friday, 16 October 2015. Categoria: General
Segun Minister di Husticia,

ORANJESTAD(AAN): Durante e seminario Diamars di ENNIA riba prevencion di accidente
yama ‘Prevent Now’, DIARIO a entrevista Minister di Husticia Arthur Dowers, kende a habri e
seminario.
E Mandatario a indica cu esaki ta e di dos seminario di ENNIA cu el a participa na dje y cu e ta
sumamente contento cu e iniciativa di ENNIA pasobra ta importante pa companianan cu ta traha
den comunidad, mester duna algo bek na comunidad.
“Door di bin cu un seminario di concientizacion, bo ta duna algo bek na comunidad y pa e
comunidad pensa riba su propio comportacion”, segun Dowers.
E mandatario a sigui bisa cu e ta spera cu ENNIA lo sigui hasi e tipo di seminarionan aki
anualmente, pero tambe lo ta bon pa mas partner scoge pa hasi seminario, congreso etc.
No mester ta uno grandi, pero ta bon pa aporta.
“Tin diferente manera creativo cu nos por uza pa hasi nos comunidad mas safe y pa hasi nos
hendenan mas conciente, cu por yuda cu prevencion y reduccion di riesgo”, e Minister a sigui
bisa.
Pa loke ta e cantidad di accidente den nos comunidad, Minister Dowers a bisa cu ora cu el a subi
como Minister na 2009, un di e prioridadnan di gabinete di AVP tabata tin ta trafico.
Si bo analiza bon, husticia ta responsabel pa prevencion di tur tipo di riesgo y un di e riesgonan
grandi cu poco atencion tabata haya ta trafico.
Si bo compara e daño cu crimen ta hasi na comunidad, esaki ta hopi menos cu e daño causa pa
accidentenan, pa loke ta seguridad.
“Pesey nos a bisa cu nos ta pone esaki como un aspecto central den nos maneho”.
Esaki segun Minister Dowers, kende a sigui bisa cu hopi hende no ta conciente di esey.