Page 34 - AHATA

Specialmente p’e ceremonia aki tabata na Aruba e Chief Executive Officer di
SLM, Radjesh Radjkoemar, Den cuadro di esaki el a bin ta bishitando e diferente
companianan cu SLM tin acuerdo cu nan. Awor e ta na Aruba p’e acuerdo cu e compania
Fast Delivery. El a keda masha impresiona cu e forma di traha di Fast Delivery, pa cual a
yega na un acuerdo hopi liher pa atende cu e benta di pasashi pa SLM. E tin tur confiansa
cu e relacion nobo aki lo trece exito p’e compania SLM y naturalmente pa Fast Delivery.
Tur cos a cuminsa ora cu el a haya bishita di Fast Delivery, kende a ofrece e compania di
aviacion Surnameño un pakete hopi interesante pa bende riba e mercado di Aruba.

E ta encera bishita na diferente sitio turistico di Surinam, cu e aspecto ecologico den
mente. Banda di esaki, Fast Delivery ta bay atende e parti di carga tambe pa SLM.

“Mi ta hopi contento cu e laso nobo aki y p’esey mi a dicidi bini pa celebracion di e
acuerdo nobo aki,” el a duna di conoce.

Tambe tabata presente n’e ceremonia oficial di e relacion nobo di trabou aki entre Fast
Delivery y SLM, Frank Yudel, kende tabata traha den e ramo di aviacion y carga den
pasado.

Sinembargo cu satisfaccion e ta mira e laso crea entre e dos grandinan aki den mundo di
aviacion, cu ta beneficia e clientenan na prome lugar, no solamente cu pasashinan, pero
tambe cu e parti di carga. “Ta beneficio so esaki ta trece p’e clientenan. E lo stimula
sector priva pa haci mas na exportacion,” el a bisa.

Director di Fast Delivery, ta hopi orguyoso di e logro aki, pero mas cu tur cos agradecido
n’e team di e compania cu a traha incasablemente pa logra e acuerdo. “E clientenan ta
gana cu e acuerdo aki, pero nos aki na Aruba tambe a gana,” Gigi Helder a expresa.