Page 24 - DESPA 7 APRIL 2016

Minister di Salud Publico , Cuido di nos Grandinan y Deporte
dr. Alex Schwengle presente na Scol Cacique Macuarima:
“Concepto di Scolnan Saludabel ta simbolisa e futuro
direccion cu nos tin cu bay”

Wednesday, 06 April 2016 22:09
Comparti

Minister di Salud Publico, Cuido pa nos Grandinan y Deporte, dr. Alex Schwengle, tabata presente
durante e celebracion di Dia Internacional di Actividad Fisico na Scol Cacique Macuarima. Akinan el a
reuni cu e muchanan y delibera hunto cu nan, e importancia di hiba un estilo di bida sano y di actividad
fisico pa asina tene e curpa den condicion.

Scol Cacique Macuarima ta un di e scolnan cu ta participa den e proyecto di Scolnan Saludabel, algo cu
sigur nos kier mira mas den e otro scolnan rond di Aruba den futuro.
Mañan, dia 7 di April, ta dia Internacional di Salud, cual celebracion a wordo incorpora na e scol, hunto
cu e dia di awe.
E concepto di gezonde scholen, segun e scol aki, ta simbolisa e futuro direccion unda tin cu bay, no
solamente cu nos scolnan, pero nos hobennan, nos yiunan, pa crea e adultonan cu nos kier.
E programa di scolnan saludabel ta hopi mas cu salud. No ta solamente movecion, ni come y bebe
saludabel, sino tambe e formacion di nos futuro ciudadanonan. Pesey Minister ta aplaudi e trabao cu ta
wordo haci na e scol, pero falta hopi ainda.
E realidad ta pa facilita tur scol, den tur sorto di manera, pa nan tambe cuminsa cu nan programa di
scolnan saludabel bao di guia di gobierno, unda cu sigur e scolnan por conta riba sosten di minister
Michelle Hooyboer-Winklaar y minister Schwengle mes, unda cu nan ta bay traha duro tambe pa crea un
fondo specificamente pa promocion di salud y pa yuda scolnan saludabel pa e bira un exito nacional.
Den nos cultura den pasado tin hopi cos tabata bon. Antes nos hendenan tabata come tiki carni, hopi
pisca y bonchi. Den curso di decenianan por a mira cu cos a cambia hopi. Fastfood a haci su entrada y
lastimamente nos aki na Aruba, a coy hopi mal custumber di e cultura Mericano y move menos. Via e
muchanan kier bay transforma nos manera di biba den uno saludabel cu nos mes y ta algo hopi
necesario, pasobra ta wak cu e incidencia di malesanan manera obesidad, hypertensie y diabetes, ta
explotando na Aruba y dado momento e lo ta impagabel pa cover tur e gastonan aki. Y esaki ta e unico
herment cu ta necesario pa garantisa, pa aki 20 pa 30 aña cu nos por mantene nos sistema di salubridad
sostenibel, e mandatario a comenta.