Page 3 - awem
P. 3
AWEMainta Diamars 20 Oktober 2015 3
Ampliando programanan di
screening pa deteccion tempran
Medidanan
preventivo ta
reduci chens pa
haya cancer cu 50%
Di acuerdo cu Minister dr. Alex
Schwengle
NA CLAUSURA di e congreso
multidisciplinario di hematologia y
oncologia cu a tuma lugar diahuebs,
diabierna y diasabra ultimo, Minister
dr. Alex Schwengle a expresa hopi
palabra di elogio p’e organisadornan
cu a provee sesionnan cu mas di
30 orador, incluyendo profesor y
specialistanan for di Merca, Hulanda,
y otro paisnan.
Minister Schwengle a bisa cu e congreso aki ta
algo unico pa Caribe pa cu e forma cu el a wordo
desaroya y e nivel haltisimo cu e tabatin.
El a splica cu e dos prome dianan tabata dirigi na
specialistanan den e ramo di oncologia y enfermedadnan
di sanger, y e di tres dia a habri e congreso pa
participacion di publico, enfermeria y otro profesionnan
den cuido di salud.
E ultimo dia tabata primeramente dirigi riba prevencion
y screening pa deteccion tempran y, consecuentemente,
un chens mas grandi pa cura y sobrevivencia.
E mandatario a subraya cu e mihor cos ta pa preveni
cancer y esaki tin hopi di haci cu e persona su lifestyle.
El a comenta cu un bon lifestyle ta resulta den un
reduccion di e chensnan pa haya cancer cu 50%. No tin
nada mas “kosteffectief” cu prevencion, segun e Minister
ta splica.
El a agrega cu pa loke ta trata screening Aruba tin
diferente programa andando, pero e congreso a dun’e
“huiswerk” pa haci pa expande riba e mehoracion di
screening pa detecta e cancer na un fase hopi mas
tempran. Minister Schwengle a bisa cu e ta un reto cu
e ta bay traha riba dje y expande e programanan, un
proceso cu ta cuminsa den e proximo lunanan.
Minister dr. Alex Schwengle a felicita e organisador/
anfitrionnan principal, esta Oncologo Hematologo Roel
Jonkhoff y Cirugano Oncologo Deepu Daryanani cu un
excelente congreso.
Den su discurso na clausura di e congreso, Minister
Schwengle tambe a papia tocante di inversionnan
controla y efectivo pa traha mas eficiente riba e calidad
cu e placa cu tin disponibel.
