Page 16 - 09-10-2015A

A yega tempo pa gobierno, SKOA y scolnan cambia nan maneho a base di ley

Publication: Tuesday, 24 November 2015. Categoria: General

SIMAR:

ORANJESTAD (AAN): Recien Directiva di SIMAR a yama un reunion cu maestronan di
SKOA pa duna informacion tocante varios punto di atencion regardando e scolnan di SKOA.
Lastimamente e reunion aki no tabata muchu bon bishita.

Directiva di SIMAR ta lamenta esaki ya cu a constata cu hopi di e informacion treci dilanti, cual
ta di suma importancia, no tabata na conocemento di esnan presente.

E meta di e reunion tabata ta pa informa maestronan di SKOA debidamente di e caso andando y
di contenido di ley cu por trece cambianan grandi den e forma cu gobierno ta atende cu scolnan
y empleadonan di SKOA.

Directiva di SIMAR a comparti informacion obteni durante reunion cu directiva di SKOA. A
resulta cu no tabata tin transparencia suficiente ya cu gran parti di e informacion y detayenan cu
SIMAR a trece dilanti tabata desconoci pa esnan presente, incluso pa cabesantenan.

Loke a resalta tambe ta cu hopi maestro no tin e informacion corecto di e caso cu algun mayor a
lanta contra SKOA, di posibel consecuencianan si cobra y/o obliga mayornan di paga
“schoolgeld” y tambe di e detayenan di loke ley ta encera pa cu cubrimento di gastonan di
scolnan.

E punto di mas importante cu SIMAR a trata ta e impacto grandi cu e caso cu mayornan a lanta
contra SKOA a causa den su scolnan y di e cambio drastico cu lo mester tuma lugar den e
maneho di gobierno pa cu SKOA su scolnan si maestronan di tal bira mas conciente di loke ley
ta encera pa cu e derecho di scolnan di SKOA.

Den “Staatsrecht Aruba” ta poni claramente cu “bijzondere scholen” cu ta cumpli cu
condicionnan stipula den “Landsverordeningnan” di enseñansa mester ser trata y atendi cu e
mesun condicionnan cu ta atende scolnan publico.

E palabra “maatstaf” ta ser usa, bisando literalmente cu gobierno mester midi cu e mesun midi pa
tur scol, tanto publico como “bijzonder” na cualnan SKOA su scolnan ta pertenece. Gastonan di
scolnan publico ta ser cubri directamente pa gobierno, incluso esnan di coriente, awa, personal,
infrastructura y material. E scolnan aki tin airco, material na abundancia (di desaroyo y
technico), remplaso (“vaste invallers”), “remedial teachers”, maestronan di guia y asistente di
klas.

Mayoria di scolnan di SKOA cu tin airco, computers, biblioteca y material tecnologico, un
gazebo y/of un area pa hunga ta scolnan cu a haya esakinan pa medio di recaudacion di fondo y/o
donacion. Masha poco tin personal di sosten pa e maestronan den klas y ta soña di tin un
asistente. Tur esakinan mester tin pa tur “bijzondere scholen” si tin nan pa scolnan di gobierno.

Gastonan di coriente, awa y telefon ta sali for di fondonan di scolnan di SKOA, cu ta limita e
disponibilidad di fondo pa cumpra material di desaroyo y pa gastonan adicional pa
funcionamento di e scolnan. Esaki ta causa cu hopi maestro y cabesante ta hinca man den nan
saco y haci gasto na scol y alumno cu no ta nan deber.