Page 22 - flip aruba bank

Aruba Bank diabierna ultimo a duna un impresion grandi di loke ta e futuro di e negoshi di
banco, caminda a celebra spantenbier di e sucursal na Piedra Plat cu lo no ta un banco cu yen di
personal manera e tabata antes, pero lo bira henter un sistema di drive-trhu cu diferente tipo di
servicio caminda comunidad mes por atende cu su asuntonan, sea ta di paga algo, cobra algo of
cambia placa y diferente otro servicio mas, cu ta mucho mas facil pa tur hende.

Tin varios banco cu ya caba a elimina cierto departamento cu nan tin ya cu automatisacion di un
departamento por nifica cu otro departamento ta bira obsoleto y no tin derecho di existencia mas.

E desaroyo nobo aki ta pone cu tin varios posicion den e banco cu lo no bay ta existi mas cu
consecuencia cu algun di e trahadonan aki lo por wordo traslada pa otro departamento pero e
cantidad aki ta hopi limita y no ta keda banconan otro opcion pa duna nan retiro.

Esaki ta un situacion un tiki fastioso y no bon pero desaroyonan den e mundo digital ta pone cu
no solamente den e sector bancario, pero den hopi otro sector laboral cierto trabounan lo bay
wordo haci pa computer cu consecuencia cu e cuponan di trabou aki lo bay perdi.

Esaki ta e tendencia no solamente aki na Aruba, cu awor ta bay wordo confronta cu esaki, pero
rond mundo na paisnan grandi manera Merca, Hulanda y varios otro paisnan na Europa y otro
continentenan, ta pasando den e desaroyo aki y hendenan ta perdiendo nan trabou cu
computernan cu ta pone cu mas y mas principalmente studiantenan tin cu analisa bon riba ki
tereno nan kier specialisa nan mes na momento cu nan caba nan scol.

DIARIO lo tuma contacto cu e sindicato pa asina haya sa mas informacion di loke cu ta e
desaroyo cu ta tumando luga actualmente na un banco local na Aruba.

http://www.diario.aw/2015/03/sistema-di-automatisacion-lo-bay-nifica-cantidad-di-retiro-den-sector-
bancario/