Page 8 - AAA

Insel Air Aruba ta evaluando riba su
rutanan
Wednesday, 13 January 2016 21:10
Comparti

Cada 6 luna ta evalua tur ruta cu Insel Air ta bula y a evalua 4 ruta specifico cu ta Georgetown for di
Aruba. A evalua di Corsou tambe, pero den e casonan aki ta mustra cu Georgetown for di Aruba no ta
produciendo e cantidad di movecion cu ta desea. Esaki ta segun CEO di Insel Air Aruba, Frederick
Nuboer.

Tambe a wak esey cu Manaus y ta wak esey tambe cu Miami. Pa loke ta Miami, ta e mesun storia cu
Venezuela, tur hende ta conciente di dje. Den e caso aki tin e cambio di benta di ticket na dollar pero no
tin concurencia tambe den esey. A ripara cu parti grandi di e avion cu ta bulando cun’e yen, ta toch
hendenan di Venezuela y cu e revenue riba esey ta relativamente abao. Insel a evalu’e, sa con e tabata
antes ora cu a caba di cuminsa cun’e, cu no tabata bula cu Venezolana y no tabata completamente yen.
Despues cu a habri pa Venezolanonan pa bula den e avion a yena completo y despues a haya e cambio di
Bolivar pa bende na Dollar, a pone un biaha mas cu a afecta e revenuenan cu ta haya riba un vuelo asina
ey, cu a dicidi pa e lunanan cu ta bin, te dia 15 di Juni, lo baha e cantidad di frecuencia y despues hasta
par’e completamente y lo reevalua si ta habri’e bek despues di dia 15 di juni.

Tin cierto dianan cu ya a bende caba y e avion ta relativamente yen, Nuboer ta splica.

Por pensa temporada di Pasco Grandi, tin cierto vakantienan cu no ta bon pa para e frecuencia tampoco.
E otro vuelonan cu ta menos yen, ta wak con ta ubica e hendenan via e vuelonan di Corsou y pa toch yega
nan destinacion. Esey ta conta pa tur otro destino. Ta conta pa Georgetown y Manaus tambe.

Tambe tin Medellin, cu pa dos luna lo par’e un rato, dus no lo tin vuelonan for di Aruba, pero si for di
Corsou y lo restart’e den e temporada di Pasco Grandi atrobe.

Insel Air Corsou lo sigui bula Miami. E no tin di haber tanto cu e isla Corsou. E tin di haber cu kico tin tras
di e netwerk. Mester wak asina cu tin destinacionnan den Latino America, ta yegando Corsou cu vuelonan
di Insel Air y for di Corsou ta Sali for di Miami. For di Aruba, esey ta relativamente abao ainda y for di
Corsou e ta hopi mas grandi, pasobra ta un compania cu ta existi hopi mas largo. Insel Air Aruba a crece
hopi rapido aña pasa, cu a pone cu a expone pa un situacion asina aki. Awor aki ta reevalua wak si di
berdad por continua cu un ruta asina aki.

http://www.24ora.com/local-mainmenu-5/104115-insel-air-aruba-ta-evaluando-riba-su-rutanan