Page 49 - FDLP

E dia anterior el a caba di regresa di Monteria Colombia unda actualmente tin un
campeonato di softball masculino mayor di CONSURSA tumando lugar entre 11 pais.
Sinembargo el a probecha pa atende un reunion di CONSURSA unda a logra firma e
convenio oficial final pa Aruba bira e proximo cede pa organiza un campeonato

internacional di softball fast pitch den categoria femenino mayor. Desde Februari caba
Aruba a duna su palabra y awor a firma.

A repasa profundamente e rekisitonan cu pais cede mester cumpli cune pa locual ta

trata e tereno pa e evento, condicionnan cu WBSC (World Baseball & Softball
Confederation) kendenan lo auspicia esaki y di acuerdo cu nan contracto lo mester
transmit e evento via live stream den un calidad halto pa tur 5 continente rond mundo.

Nan mes lo duna e asistencia maximo pa esaki. WBSC lo manda umpire in chief Santos
Vasquez y hefe di scorer di WBSC pa nos continente Sr. Rafael Valle kendenan hunto cu
nos localnan lo dirigi e partinan aki. Alaves lo percura pa un Comision Tecnico y un
comision disciplinario di CONSURSA /WBSC hunto cu nos dirigentenan local pa ta

encarga cu e area specifico aki. Aruba a ricibi e autorisacion pa cuminsa forma su
comision organizador local kendenan lo bay tin un tarea bastante pisa.

Pa organiza un evento asina no ta facil y pa organis’e y pa cumpli cu tur rekisitonan di

CONSURSA /WBSC ta mucho mas dificil. Den simannan nos dilanti trabaonan lo inicia.
Parlamentario Croes a splica cu Minister di Deporte Sr. Danqui Oduber ta para tras di e
evento aki. Parlamentario Endy Croes a hiba combersacion basta amplio cu Alcalde di
Monteria Sr. Marcos Daniel Pineda kende a caba di construi ful un area deportivo

consistiendo di un parke di baseball y un parke di softball ultra moderno, lugar pa
hende por cana y recrea, un pista pa rolschaats cu ta popular na Colombia, cancha di
tennis y pues un facilidad enorme.

Alcalde ta kere masha hopi den deporte y ta sigur esaki lo kita hobennan for di caya y
siña nan un disciplina sano. El a splica tambe con el a duna mesora tur cooperacion
necesario for di estadia, alimentacion y transporte local pa trece e competencia
masculino actual Monteria y ta sigur cu Aruba lo bay tin un bunita evento. Antonio

Morales abogado di profesion y presidente di CONSURSA a gradici publicamente Aruba
pa acepta e reto aki pa promer biaha den historia di softball di Aruba.