Page 5 - AM211027

Diaranson, 27 October 2021 AWEMainta.com 5

Accidente serio na Pos Chikito, mester a

usa materiaalwagen pa libera un chauffeur

Diamars mainta tempran a sosode un accidente serio n’e t-weg
na altura di Oduber Welding. Na yegada di Polis nan a topa cu
dos auto pega contra otro. Un di nan tabata un Chevrolet Trax
y e otro tabata un Toyota Yaris.

Ambos chauffeur tabata herida. Chauffeur di e Yaris a keda
pega den e auto y p’e motibo aki mester a pidi presencia di
Materiaalwagen di Bomberor.

N’e sitio a presenta dos ambulance. Na yegada di bomberonan
mesora nan a drenta accion pa libera e chauffeur cu tabata
pega. E homber tabata na tino y te unda nos por a mira tabata
comunica cu esnan cu tabata yude sali.

Manera cu e vehiculonan a dal ta mustra cu un lo a subi
caminda y kizas no a pone tino con serca e Chevrolet tabata y
tampoco e velocidad cu lo ta biniendo cu ne.
Den e impacto e Trax a dal den e banda robes di e Yaris y ta
cargu’e bente pazuid di caminda, pasando serca di un pal’i luz
y termina contra un pal’i kwihi.

Despues cu a saca e chauffeur el a wordo hinca den ambulance,
unda cu despues nan a sali direccion Hospital.
Den e impacto un di e autonan a dal un steunpaal di Elmar
y Polis a pidi pa presencia di Elmar y Setar pa motibo cu e
wayanan di Elmar y di Setar tabata colga. Debi n’e orario,
trafico a stagna bastante y crea fila. Tur esaki na momento cu
varios Polis tabata bezig cu e ladronicia di bromernan for di
Warda di Polis di Balashi.