Page 16 - MIN ON_Neat

editor 3 MINS
POST VIEWS: 2
POSTED ON JULY 17, 2017, 9:19 AM

ORANJESTAD, Aruba

Prome Minister Eman y Benny Sevinger a bishita e scol

“Tur cos ta cla pa ricibi e studiantenan?” Prome Minister Mike Eman a puntra ora cu el a yega di
bishita na St. Rosa College, un scol di mas di 150 aña cu a haya su prome renobacion completo bou
Gabinete Mike Eman II. E biaha aki e bishita di Prome Minister Mike Eman y su colega Benny
Sevinger tabata pa mira e ultimo trabounan cu ta wordo haci prome cu ricibi e studiantenan, cual ta
asfaltamento di e speelplaats cu un acabado fini pa proteccion di e muchanan.

“Mi ta contento cu un scol asina historico manera St. Rosa College cu den historia di educacion na
Aruba a hunga un rol sumamente importante pa scol basico ta duna realce na renobacion di centro di
ciudad.” Ta masha importante den e renobacion aki, Eman a bisa, cu e speelplaats ta bay haya un
acabado bunita y fini. Aworaki mayoria speelplaats di scolnan na Aruba tin asfalt pero uno hopi
bruto cu ta causa lesion na e muchanan ora di wega, “pero esaki lo tin un bunita acabado.” El a sigui
splica cu Gobierno a pone un presupuesto pa mehora un serie di speelplaats di scolnan cu un acabado
mas fini pa proteccion di e muchanan. E trabounan ta programa pa tuma luga den e temporada di
vakantie aki.

E mandatario a gradici tur esnan cu a coopera pa e proyecto aki, cuminsando cu Minister di
Enseñansa Michelle Hooyboer, Minister Sevinger, DOW, SKOA y esnan di Rosa College mes. “Nan

a bisami caba cu e docentenan no por warda pa muda y inicia nan trabou den un ambiente asina
agradabel e mandatario a splica.”

Durante e bishita aki tabata presente tambe sr. Eric Vrolijk, di seccion Uitvoer di DOW, kende a
splica cu un parti di trabou cu a tuma nan hopi tempo tabata e parti di dak, cu tabata di e material
asbest. Pa esaki mester a tuma tur e precaucionnan necesario, cu a tuma su tempo. Na su luga a pone
dak di aluminium cu isolatie cu ta brinda mas frescura den e localnan.