Page 85 - Min VOS June 4 2015

Health Care Conference a finaliza di manera exitoso

Publication: Thursday, 4 June 2015. Categoria: General

ORANJESTAD (AAN) Diaranson den oranan laat di atardi a finalisa e prome Health Care
Conference cu tabata un exito grandi pa Aruba durante di e tres dianan nos tras.

Remarcabel den e conferencia aki tabata cu for di e prome dia te cu e ultimo tur esnan cu a
registra a participa den henter e conferencia, tanto den oranan di mainta scuchando e oradornan y
e parti di merdia unda tabatin “break out session”.

Importante di e conferencia aki tabata cu esnan cu a participa por a haya en total 18 punto di
acreditacion, cu ta casi mita di loke e profesionalnan di e area di salud mester logra den un aña
den nan re-educacion.

Por a mira diferente dokter local cu a participa den e Conferencia aki manera dr. Yagua Fingal;
dr. Yagua; dr. Samuels; dr. Sneek; dr. Croes, dr. Beke, etc. E conferencia tabata asina bon hinca
den otro cu hasta a haya elogio di parti di miembronan di oposicion manera Glenber Croes,
kende a participa den tur e tres dianan mescos cu e Presidente di Comision di Fiho di Parlamento
riba Salud drs. Mervin Wyatt Ras.

Dr. Beke tabata masha contento cu contenido di e conferencia y tabatin algun aspecto cu e kier a
coopera cune cu sugerencianan.

Ex Minister di Salud Publico di Aruba, 1994 pa 1998, dr. Lilli Beke a participa den e prome
Health Care Conference Aruba 2015. Den un declaracion cu e ex mandatario a duna, e ta papia
di incorpora mas dokter di cas pa haci e prome linea di cuido mas fuerte, y controla asina e
gastonan di e sector aki.

Na apertura di e Health Care Conference Aruba 2015, cu tabata un sugerencia di IPKO (Consulta
Interparlamentario di Reino), Minister Edith Schippers di Salud Publico di Hulanda, a menciona
cu pa logra un miho control di gastonan, e cuido di prome linea mester ta hopi fuerte. Ora ta
papia di prome linea ta referi na e.o. na dokternan di cas y fisioterapistanan.

Den combersacion cu dr. Lilli Beke, un dokter di cas y ex Minister di Salud Publico, el a haci un
analisis di e pensamento aki. Na su opinion, Aruba tin un cuido di prome linea basta bon. “Pero
por mira cu cada biaha mas peso ta wordo poni riba nos y esey no semper ta alcansabel, pasobra
tin e parti practica y e aspecto di administracion. Tin biaha e dosnan aki ta bini den conflicto cu
otro.”