Page 87 - Min VOS June 4 2015

Ir. Edwin Jacobs director SVb cu expectativa positivo riba
pronto solucion

Publication: Thursday, 4 June 2015. Categoria: General

Tocante attestatie de vita di pensionadonan:

ORANJESTAD (AAN) – Director di SVb, Ir. Edwin Jacobs, a tuma nota di e remetido publica
dialuna, den Diario, cu ta mustra un proposicion interesante.

“ Solamente mirando cu e instancia cu ta uza esaki ta SVB Curacao, ta na e instancia ey pa
acerca Oficina di Registro Civil na Aruba pa haci e intercambio aki” señor Jacobs a señala den
un entrevista cu nos redaccion.

“ Di nos banda nos a haci SVB Curacao un proposicion cu ta hopi similar. Ta asina cu e siman
aki a cuminza e conferencia di salud pa paisnan den Reino. Dialuna, riba e prome dia di e
conferencia, e director interino di SVB Curacao a acerca mi persona riba e articulo cu diasabra a
keda publica den Diario riba e caso aki.

“ Despues cu mi a splica e director interino di e sucedido, cual ta manera cu a keda relata den
Diario, el a lamenta masha hopi cu esaki mester a pasa, siendo cu no ta necesario y a ofrece pa
un siguiente ocasion cu tin e tipo di problemanan aki, pa contact su persona directamente pa
asina e por agiliza e trabaonan na Curacao. Esaki mi ta haya un actitud masha constructivo pa
soluciona problema”, Ir. Jacobs a duna di conoce.

Na mes momento Ir. Jacobs a haci e director interino di SVB Curacao, e proposicion pa nan yega
na un intercambio di informacion, manera SVb Aruba tin actualmente cu SVb Hulanda.

“E sistema ta uno facil pa implemente y sin cu e ta nifica un molester pa e pensionado. E sistema
ta basicamente, nos ta cuminza na identifica e pensionadonan comun, pues pensionadonan cu ta
cobra tanto for di SVb Aruba como di SVB Curacao. Nos ta calcula cu mas di 95% di e
pensionadonan ta comun. For di e momento cu determina e lista aki, locual nos ta cuminza
manda Curacao tur luna, ta un lista di e pensionadonan comun cu a fayece e luna ey. Y mientras
cu SVB Curacao no ricibi un notificacion di SVb Aruba cu un pensionado comun a fayece,
kiermeen cu e pensionado comun ta na bida y lo continua ricibi su pension, sin e necesidad di
entrega un attestatie de vita cada tanto tempo. E mes un sistema aki, nos tin actualmente cu
Hulanda pa un tres aña caba y e ta funcionando na satisfaccion. Nos ta den deliberacion cu St.
Maarten tambe pa introduci e sistema aki. Director interino di SVB Curacao a tuma e
proposicion pa studia esaki y pa duna un contesta si nos por cuminsa traha riba e base aki. Pues,
mi expectativa ta, cu si e boluntad ta existi, cu riba termino cortico nos por anuncia cu e asunto
di attestatie de vita pa pensionadonan comun ta keda resolvi satisfactoriamente”, Ir. Edwin
Jacobs, director di SVb a duna di conoce na nos redaccion.

http://www.diario.aw/2015/06/ir-edwin-jacobs-director-svb-cu-expectativa-positivo-riba-pronto-
solucion/