Page 6 - AWEMAINTA

6 AWEMainta Diaranson, 12 Juli 2017

Parlamentario Jeffrey Kelly (AVP):

Un lider politico no por ta dispuesto

pa sacrifica futuro di fondo

di pensioen pa haya voto

CAMPAÑA electoral ta siguiendo su curso y ya pueblo por a tuma nota caba, cu tin
politiconan y nan partido, ta haciendo tur loke cu nan por, pa trata di gana simpatia
y sosten di votadornan.
Parlamentario Jeffrey Kelly di fraccion di AVP ta cuestiona e intencion di e lider di
MEP y su coleganan populista di partido MEP, riba nan insistencia pa bay mishi cu
e fondo di pensioen si acaso MEP logra yega na poder.

GRITONAN POPULISTA Y HIPOCRITA
“Nos ta kere cu e tipo di expresion aki, caminda lider di MEP ta papia
di reduci e edad di pensioen den futuro, ta muestra di un sentimento di
desesperacion pa logra convence pueblo, cu e MEP cu a goberna nos pais
for di 2001 te cu 2009, ya no ta existi.

Sinembargo t’e propio lider di MEP awendia, Evelyn Wever Croes,
como experto den asunto di impuesto, a sugeri na Gobierno di MEP e
tempo ey, cu e unico solucion pa salba futuro existencia di e fondo di
pensioen, ta di aumenta e edad di pensioen te cu 65 aña, loke a wordo
rechasa pa Gobierno di su partido geel.

Aworaki pueblo por tuma nota di un lider politico cu tin cu bay segun
interes di su partido ta pidi p’e bay, no e interes general di su pueblo,
ya cu e solucion cu Evelyn a sugeri den pasado pa salba e fondo di
pensioen, awor ya no tin e balor politico pa su persona, sigur despues
cu Gabinete Mike Eman si a uza su formula y tambe conseho di exper-
tonan di SVB, pa salba e fondo di pensioen cu tabata na rand di bancarota.

Ora c’un lider politico di un partido cu a wordo manda cas na 2009 pa mal maneho
di e.o. e fondo di pensioen, cu su Gobierno nunca a duna pensionadonan algo
riba nan pensioen, awor ta pretende di bin mishi cu un fondo cu a wordo con-
solida na 2014, ta momento pa realmente pueblo pensa riba #tenehopiMIEDO!
Segun Jeffrey Kelly, na Hulandes tin un dicho hopi conoci cu ta bisa: “Als
de vos de passie preekt, boer pas op je ganzen,” y den e caso aki cu e vision di
MEP su lider y su otro coleganan di partido pa bay mishi cu e fondo di pensioen
den futuro, ta un alarma grandi pa futuro existencia di nos fondo di pensioen.

PROMESANAN IRESPONSABEL
Loke ta mas peligroso den e vision nobo aki di tanto Evelyn Wever Croes como
su partido MEP, t’e hecho cu mientras nan ta hunga wega populista cu e fondo
di pensioen, ningun caminda ta papia con nan ta bay financia e vision aki pa cu
e fondo di pensioen den futuro.
Tipico di MEP, nunca nan no ta splica CON nan lo haci loke nan ta priminti.

Mas ainda despues cu Director di SVB, ing. Edwin Jacobs durante un presen-
tacion den Parlamento, ta duna informacion detaya di e rumbo cu e fondo di
pensioen lo bay den futuro segun e vision di MEP.
Dentro di algun aña e fondo di pensioen lo ta bancarota y pensionadonan lo
mira nan pensioen mensual baha cu 30% te ora cu e fondo di pensioen no por
paga esaki mas na pueblo.

Aki pueblo por ripara cu partido MEP y su lider ta dispuesto na sacrifica futuro
di e fondo di pensioen, basta e trata di gana simpatia den pueblo pa su partido,
cu ya ta bon conoci p’e mal maneho di e fondo di pensioen aki cu nan a hiba
den pasado,” Parlamentario Jeffrey Kelly ta declara.