Page 9 - AM211022

Diabierna, 22 October 2021 AWEMainta.com 9

Parlamentario Raymond

Kamperveen a confirma

Dictadura moderno di lider

di partido MEP lo perdura

te cu luna di januari 2022

E falta di experencia tanto den politica y gobernacion
di e pais, ya caba a cuminsa manifesta su mes den e
participacion di partido RAIZ den e coalicion actual,
caminda practicamente ta solamente e cantidad di e
dos asientonan den Parlamento, t’e unico aporte real
n’e Gobierno nobo.
E inocencia di e politiconan di RAIZ e siman aki a
manifesta su mes formalmente tanto cerca lider di
e partido Ursell Arends como Minister di Integridad
como e miembro di fraccion di RAIZ den Parlamento,
esta Raymond Kamperveen.

Prome Minister despues di reunion cu Gobernador e
siman aki, a confirma cu cambionan necesario den e
Landsverordening Instelling Ministeries (LIM), lo ta
cla pa inicio di aña nobo.
Den reunion di Parlamento ayera mainta, Raymond
Kamperveen tambe a confirma esaki mustrado cu
e LIM lo wordo cambia oficialmente pa inicio di
januari ora cu reces di Parlamento caba, esta si logra
cu a cambionan necesario.
Mientrastanto tur hende ta puntra ta kico lo pasa
e ora, ya cu mientras Ministernan manera Rocco
Tjon, Endy Croes, Geoffrey Wever y Ursell Arends
ta atendiendo diferente asunto di Gobierno, ningun
decision cu nan tuma n’e momentonan aki, lo tin un
base legal y nan lo ta violando e mesun LIM cu nan
tin cu cambia.

E desaroyo aki ta wordo mira pa hopi experto riba
tereno politico aki na Aruba, como estilo di dictadura
di parti di e lider di MEP, Evelyn Wever Croes,
caminda solamente su persona hunto cu colega
Minister Xiomara Maduro, Glenbert Croes y Dangui
Oduber, t’esnan cu tin base legal pa haci algo, ya cu
legalmente segun e “LIM bieu” nan tin tur autoridad
legal pa haci algo manera haci cambionan y tuma
cierto decision.
Por ehempel n’e momentonan aki Minister Glenbert
Croes ainda ta legalmente responsabel p’e cartera di
asuntonan social y mesun cos ta conta pa Minister
Xiomara Maduro pa loke ta asuntonan economico
y tur decision cu Geoffrey Wever tuma relaciona su
maneho economico, tin cu wordo aproba pa Xiomara.

DICTADOR
E carteranan di Husticia di Minister Rocco Tjon
como e cartera di Enseñansa di Minister Endy Croes,
ta cay awor bou di guia legal di Prome Minister
Evelyn Wever Croes, ya cu su persona segun e LIM,
t’e Minister di Asuntonan General, pues ta su persona
legalmente lo ta responsabel pa cualkier decision den
e ministerionan aki te ora cu e LIM wordo aproba.

E ta un tipo di dictadura, un tipo di manipulacion
politico cu a bin ta tumando lugar for di momento cu
e Prome Minister a manda su prome gabinete cas na
luna di maart.
Desde e tempo ey e ta ‘Heer en Meester’ di su Gobierno
y e inocencia di su partner nobo den e coalicion aki, a
haci e situacion ainda mas facil p’e lider di MEP.
E Ministernan nobo den e gabinete actual, manera
sres. Tjon, Arends, Croes y Wever, te cu luna di
januari proximo, ta figura como “voceronan” di nan
ministerio ya cu legalmente nan no tin mucho di bisa
den e maneho oficial di nan careteranan.