Page 18 - MIN ON

Cabesante di e scol Lai Ping Carthy Chong, tabata presente na momento cu Prome
Minister Mike Eman y Minister di Infrastructura Benny Sevinger a presencia inicio di e
ultimo parti di e trabou, cu ta asfaltamento di e speelplaats cu un acabado fini.

“Ultimo lunanan e maestronan tabata hopi entusiasma pa nan bolbe nan scol y tabata
preparando ultimo simannan pa cuminsa empaketa tur material pa drenta den un ambiente
cu nos muchanan merece y tambe den un tremendo forma,” e Directora a cuminsa pa
splica.

Sra. Lai Ping a splica cu ora cu el a bira cabesante 11 aña pasa, el a tende cu a papia di
renobacion, pero esaki no a tuma lugar, cu excepcion di algun mantencion chikito.

Pero despues nan a haya e noticia cu “St. Rosa College lo haya su renobacion completo,
manera un monumento merece.”

Awor cu Gobierno di Prome Minister Mike Eman a percura pa renobacion y duna un scol
di calidad, esaki ta nifica hopi pa educacion.

“Un scol di calidad,” e cabesante a bisa, “ta haci cu muchanan ta bin scol motiva pa siña,
motiva pa bira un bon ciudadano den comunidad di Aruba. Mi ta kere cu Rosa College
tin e capacidad, tin e team pa duna nos muchanan e educacion cu nan merece.”

E scol nunca a wordo drecha di e forma aki, e cabesante a splica. Pesey e renobacion
tabata hopi necesario p’e scol cu tin mas di 150 aña di existencia, y mantencionnan
chikito no tabata yuda mas.

Henter e proyecto a costa 4 miyon florin. Den e aña escolar nobo e scol lo tin alrededor di
150 mucha cu 9 docente, un invalster, un begeleider y e cabesante pa yega na un total di
13 profesional.