Page 102 - KPA FLIP 9th APRIL,2016



Atraco Team a detene 3 atracado
hoben na nan cas

Posted on 04/8/2016 5:38 pm AST | Updated on 04/8/2016 9:23 pm AST

ORANJESTAD - Diabierna mainta trempan un ekipo special di Polis a tene un "inval" na 3
cas, relaciona cu un investigacion grandi andando riba varios caso di atraco. Dennis Jacobs,
hefe di "Atraco Team" a conta cu pa e aresto aki a haci uzo di diferente departamento,
manera ta Polisnan uniforma di San Nicolas, Arrestatie Team, Observatie Team, K9 Team,
Polisnan Forensico, Departamento di Droga y asina por sigui menciona.

DETENCION

"El a bay bon. Nos a detene tres sospechoso den e casonan aki. Mi tin cu bisa cu un di nan ta
mayor di edad y lamentablemente dos sospechoso ta menor di edad", segun Dennis Jacobs a duna
di conoce. Ta sospecha cu e trio aki lo ta envolvi den un caso di atraco arma cu a tuma luga na
luna di december ultimo. Aunke ta papia di un sospechoso mayor di edad, toch tur ta hobennan cu a
cay den mal caminda. Un di nan tin 15 aña, e otro tin 16 aña y esun mayor di edad tin apenas 18
aña di edad!

POLIS BON PREPARA

A opta pa bay cu hopi Polis, pa asina por ta bon prepara pa e detencionnan. Manera ta conoci, den
e tipo di casonan asina tin biaha e detencionnan aki por bira peligroso, specialmente si ta teme cu e
sospechosonan por ta arma. Den e caso aki ta percura pa un strategia diferente, den cual e
sospechosonan no tin chens of masha poco chens pa sea resisti of purba scapa for di man di
autoridadnan.