Page 103 - KPA FLIP 9th APRIL,2016

Atraco Team a detene 3 atracado hoben na nan cas

Friday, 08 April 2016 16:47
Comparti

Diabierna mainta trempan un ekipo special di Polis a tene un "inval" na 3 cas, relaciona cu un
investigacion grandi andando riba varios caso di atraco. Dennis Jacobs, hefe di "Atraco Team" a conta cu
pa e aresto aki a haci uzo di diferente departamento, manera ta Polisnan uniforma di San Nicolas,
Arrestatie Team, Observatie Team, K9 Team, Polisnan Forensico, Departamento di Droga y asina por
sigui menciona.

"El a bay bon. Nos a detene tres sospechoso den e casonan aki. Mi tin cu bisa cu un di nan ta mayor di
edad y lamentablemente dos sospechoso ta menor di edad", segun Dennis Jacobs a duna di conoce. Ta
sospecha cu e trio aki lo ta envolvi den un caso di atraco arma cu a tuma luga na luna di December
ultimo. Aunke ta papia di un sospechoso mayor di edad, toch tur ta hobennan cu a cay den mal caminda.
Un di nan tin 15 aña, e otro tin 16 aña y esun mayor di edad tin apenas 18 aña di edad! A opta pa bay cu
hopi Polis, pa asina por ta bon prepara pa e detencionnan. Manera ta conoci, den e tipo di casonan asina
tin biaha e detencionnan aki por bira peligroso, specialmente si ta teme cu e sospechosonan por ta arma.

Den e caso aki ta percura pa un strategia diferente, den cual e sospechosonan no tin chens of masha poco
chens pa sea resisti of purba scapa for di man di autoridadnan. Cuerpo Policial Aruba ta masha contento
cu e aporte cu ta hayando for di comunidad, den forma di informacionnan valioso cu ta suministrando na
Polis pa soluciona e tipo di casonan asina. E grupo di recherchenan specialisa den investiga casonan di
atraco tin un porcentahe halto di casonan soluciona, den cual ta gara mayoria di e sospechosonan y
manda nan Corte ta ricibi castigo. Claro, mas ayudo ricibi di comunidad, yamando e tipline 11141, mas
criminal ta logra encarcela y tene nos cayanan mas sigur y liber di malhechornan.