Page 21 - awem sept 24

AWEMainta Diahuebs, 24 September 2015 21

Fiesta di Cunuco
cu Mercado
Santa Rosa y
Monumenten Fonds

MANERA tabata e caso di aña pasa cu prome biaha cu esaki a wordo

organisa. Papiando akinan di “Fiesta di Cunuco” cu tabata un exito total.
Den un ambiente di cas tipoco Arubano situa na Tankileendert.
E cas a wordo muebla cu mueblenan di antaño y completemante den un
ambiente festivo. Tur esnan cu a yega por tabata tin e oportunidad di pasa
paden di e cas y admira tur mueble y artefactonan di antaño. Personanan
a bisti na trahe tipico p’asina ricibi e bishitantenan durante henter dia di e
actividad.
Ta solamnete cu durante dia e awasero tabata menasa te cu merdia cu a cay
un awasero torencial cu mester a cansela e activiadad cu tabata un exito
total.

Asina mes cu awa a yobe ningun hende tabata kier a bandona e “Fiesta di
Cunuco” aki.
E aña aki lo bai ta e mesun caso cu ta diadomingo awo 27 di sepeterber. Pero
e biaha aki lo bai ta den e bario di Sanicolaas. Pa ta exacto den e bario Brazil
na e adres di Amsterdamstraat 21 cu ta un cas tipico Arubano. E cas tipico
aki lo bai wordo prepara di tal forma cu mueble y artefactonan di antaño.
Esaki ta wordo prepara pa Stichting Monumenten Fonds cu ya ta trahando
duro pa esaki keda cla pa diadomingo awo.
N’e cas aki tambe tin un baki di aloe caminda esaki tabata wordo prepara e
temponan aya. Di parti Aruba Aloe cu tambe ta formando parti di e evento
aki lo bai tin muestranan con e Aloe tabata wordo prepara antes.
Di parti Santa Rosa manera t’e custumber e afamado Mercado Santa Rosa
lo tey cu difrente standnan di cuminda crioyo manera u bon plato di Jambo
cu su funchi of pan bati, Cabez cu Higra, Comcomber stoba, Cabrito Stoba,
Cocolishi Stoba, y diferente sopi.
E pasabocanan dushi manera bolo, tert, koeki tambe tin pabo saboria rib’e
dia aki. Nos diferente remedinan di tera tambe cu ta bon solisita. Lo bai tin
mata tambe na benta p’asina hasi bo hogar mas bunita. Pa refresca lo tin
raspao y tambe aw’i coco fresco cu sigur lo baha bon den e solo cayente di
Aruba.

Pa loke ta trata e dia completo di e actividad aki tin ful un programa prepara
pa tur esanan cu bin hasi nos un bishita y difruta di e diferente acontecimento
cu lo bai tin. Cuminsando for di 10’or di mainta cu musica di nos dushi Aruba
cu ta e musica tipico.
Gruponan di baile cu lo tin diferente baile prepara p’e dia aki. Solistanan
tambe cu lo tey pa presenta nan tema musical. Lo tin tambe agruacionan
tipico cu tambe lo tey presente pa tur hende por baila y difruta di nos “Fiesta
di Cunuco”.
Lo bay tin tambe e skina special pa mucha cu pop corn y hotdog
E invitacion ta pa bo yega diadomingo awo 27 di september na
Amsterdamstraat 21 caminda cu lo bay tuma lugar e “Fiesta di Cunuco”
yena cu ambiente di musica, baile, cuminda crioyo y hopi mas. Lo bai tin
direrente borchi cu lo indica bo con pa yega serca nos sin problema.
Stichting Monumenten Fonds y Santa Rosa ta invitabo.