Page 5 - AM210204
P. 5
Diahuebs, 4 Februari 2021 AWEMainta 5
Minister Xiomara Maduro a reuni cu
Qredits riba mas fondo disponibel
pa micro credito na interes reduci
SIMAN pasa Minister Xiomara Maduro a reuni cu
e CEO di Qredits Hulanda sr. Elwin Groenevelt y
sr. Oliver Vieira di Qredits Aruba. Minister Maduro
a gradici Qredits pa nan yudansa pa brinda micro
credito na interes reduci na mas di 100 compania
chikito y mediano na Aruba p’asina nan por a enfrenta
y surpasa e efectonan di e pandemia.
Sr. Elwin Groeneveldt a informa cu Qredits a bolbe
pone un suma disponibel p’asina por sigui brinda
fiansa na interes reduci pa sigui yuda e companianan
chikito y mediano.
Banda di esaki e ehecutivonan di Qredits a splica
riba e bunita proyecto ‘BeYourOwnBoss’ na unda
hobennan di EPI lo wordo prepara pa bira futuro
‘entrepreneurs’ di nos pais.
Ta un hecho cu
sector HORECA ta
sangrando na Aruba
MOTIBO cu sector di restaurantnan na Aruba no ta sali
afo y bringa pa nan derechonan ta pa miedo di represalia
di parti di Gobierno. Nan tin miedo cu Gobierno
duna instruccion na Cuerpo Policial of Guarda nos
Costa pa bay y causa molester den nan negoshinan.
E ta un hecho cu e reglanan absurdo implementa dor di
Gobierno negoshinan na Aruba den e sector aki tini’e
hopi duro. Nan ta basicamente traha pa mantene nan
cabez riba awa. Ta un sector sumamente importante cu
ta genera un gran cantidad di empleo na nos pais.
Hopi famia ta depende di trabou den e sector aki.
Gastonan di operacion no a baha, mientras cu horario
y cantidad di bishitante si a baha. Esaki ta treciendo
hopi restaurant y café’s den problema serio.
Cu e caida di entrada aki, e cifra di desempleo lo sigui
subi. A yega ora cu representantenan di e sector aki
haya oido di Gobierno.
Un solucion di inmediato ta pa cambia e horario di
cierre cu ta 10:00PM. Esaki por bira 12:00 y pa 1:00
AM tur hende mester ta na cas. E simpel dos oranan
aki lo brinda un alivio grandi n’e sector aki. Aruba
Gastronomic Association (AGA), AB&FA, AHATA y
organisacionan cu ta representa e sector di HORECA
na Aruba mester uni p’asina por haya oido di Gobierno.
