Page 14 - MIN VOS

Comision di Apelacion di AVB ta hinca nan mes den posicion
fastioso

Wednesday, 21 June 2017 12:39
Comparti

Diamars anochi a tuma luga un reunion di "Beroepscommissie" di Arubaanse Voetbal Bond na nan
oficina situa den cura di Stadion Frans Figaroa na Noord. Despues di e reunion e comision a informa cu
diaranson mainta nan lo informa di nan decision riba papel, den forma oficial, relaciona cu e protesta cu
Deportivo Nacional a entama contra AVB relaciona cu e protesta entrega na un prome instante dor di SV
Dakota.Pero apenas algun minuut despues cu e comision di huristanan, abogadonan y conocedonan di
futbol Arubiano a bandona e reunion, mesora fanaticonan di Deportivo Nacional a cuminsa anuncia riba
red social cu nan a gana e protesta y cu e wega final lo tuma luga entre SV RCA y cu Deportivo Nacional
mes proximamente. Un fanatico di Nacional a skirbi cu e tin un "satelite" den e comision di apelacion y
cu a informe di e decision cu nan a tuma durante un reunion cera. Claro cu e forma aki di traha no ta
promove transparencia ni ta efectivo pa e organisacion cu ta organisa futbol riba nos isla. Mas bien e
forma aki di maniobra di Beroepscommissie ta promove mas division entre clubnan, ta promove
poralisacion den futbol y mas ainda, ta duna un impresion cu e miembronan eyden no ta integro, sino ta
faborece un ekipo specifico. Ta netamente pa evita e tipo di situacionnan asina di fanatismo, AVB ta boga
pa clubnan mes apunta expertonan pa sinta den e comision di apelacion, den un esfuerso pa tin un
organo unda clubnan por protesta si nan no ta di acuerdo cu decision di AVB. Pero si e miembronan
eyden mes ta mara na algun club y ta "leak" decisionnan interno di e comision, ta mustra e ora cu entodo
caso AVB mester reevalua funcionamento di e grupo aki. Di otro banda, nan mes por mira kico nan a
causa ayeranochi y tuma honor na nan mes! E asunto no tin nada di haber cu e decision tuma, pasobra ta
sali for di e punto di bista cu tur eyden, bon conocedonan di ley, a haci nan trabou den forma integro y
neutral. Pero e hecho cu nan ta sali y informa un ekipo pa saca un decision prome cu ora, den cierto
forma ta mancha henter e decision tuma.Consecuentemente, desde ayeranochi fanaticonan di SV Dakota
y Deportivo Nacional ta den un guera di palabra riba red social, dañando henter e ambiente deportivo cu
mester existi entre ekiponan di futbol, sea cual sea hunga e wega final pa e titulo di campeon. Cu e forma
"dudoso" aki di traha di e comision di apelacion, awor futbol ta mas dividi enbes di mas uni pa hunto
celebra e wega final pa campeon den division di honor. Ta bon pa aclaria cu, di acuerdo cu leynan di
FIFA, ekiponan no por hiba AVB dilanti Corte. Haciendo esey por "royeer" e team for di e organisacion di
futbol di Aruba. Pues, pa evita cu ta bay Corte, a funda Beroepscommissie, den cual tin 7 miembro
apunta pa ekiponan di futbol mes. Nan tur ta sea hurista of bon conocedo di futbol. E comision ta
encabesa pa mr. Ronnie Bernadina, ex Alto Comisario di Polis. E discusion a cuminsa despues di e wega
final entre SV Dakota y Deportivo Nacional, cu a keda empata, cu consecuencia di Deportivo Nacional a
clasifica pa hunga e wega pa campeon contra SV RCA. Mesora despues SV Dakota pa entrega un protesta
riba varios punto, mayoria relaciona cu hungamento cu hungado ilegal y cu hungado a hunga wega
siendo e tin 3 carchi geel y mester a keda 1 wega riba banki. AVB a duna Dakota rason y a dicidi cu e wega
final lo ta entre Dakota y RCA. Cu e realidad ey riba mesa, Deportivo Nacional a protesta na
Beroepscommissie contra e decision di AVB, cual protesta a trata diamars anochi durante un reunion. E
decision oficial lamentablemente no a sali ainda, pero si riba rednan social. Cu esey ta mustra cu
miembronan di e comision tin problema cu secrecia, cu ta parti integral di e maneho integro cu nan
mester asumi, pa promove neutralidad y seriedad den cada decision cu nan tuma....cu mester ta pa
promove fairplay, igualdad, cumplimento cu regla y promove mas union den ekiponan di futbol riba nos
isla.