Page 75 - MIN TTC 27 FEB 2016

Johhny Croes ta pidi disculpa di e yama nos musiconan "a
bunch of hypocritical morons"

Friday, 26 February 2016 18:57
Comparti

No ta tur musico tabata invita y ta participando den e proyecto pa graba nos himno nacional hunto cu e
orkesta sinfonico na New York.
E hoben Jonathan Veira ta esun cu a pusha e proyecto aki, cu sosten di comercio local, pa logra acomula
e miho musiconan y cantantenan di Aruba hunto. Pero mientras cu riba red social mayoria ta gaba di e
union existente, otronan tin opinionnan diferente. Un di nan ta e conocido Johnny Croes, kende a
cataloga e musiconan di Aruba como "a bunch of hypocritical morons".
Awe sinembargo el a pidi disculpa na tur artista/musiconan Arubiano na New York pa a yama nan asina.
“No tabata mi intencion pa yama boso a bunch of hypocritical morons. Mi tabata un poco rabia ora mi a
tende cu tur e musiconan di e orkesta di New York a wordo paga, e studio di grabacion a wordo paga,
aerolinea nan a wordo paga, hotelnan a wordo paga, restaurantnan etc a wordo paga, menos e
artista/musiconan Arubiano”, asina Johnny Croes a skirbi awe riba su pagina di Facebook.
“Mi a compronde despues, cu pa mayoria di e artistanan (despues di a haya pasashi, hotel, cuminda y
drinks pornada) tabata un honor y algo noble y patriotico y historico pa tabata parti di e proyecto aki y cu
esaki a trece un sentimento di union y hermandad entre e musiconan, cu lo dura te ora nan baha for di e
avion ora nan yega bek Aruba”, segun e musico profesional ta opina. Asina mes el a enfatisa cu el a mira
algun artista cu no por canta y un otro cu nunca kier canta na papiamento pasobra e semper e mesun
musico ey a critica cu wals “ain't we culture”. Johnny Croes ta bou di e impresion cu tur cos ta pa show,
basta cu e ta mustra bon riba potret y video.
“Y mi ta sigur cu tur e artistanan cu a participa (despues di a haya pasashi, hotel, cuminda y drinks
pornada), ta hopi gradici y tin un gran admiracion sincero pa Jonathan Vieira como productor, musico,
pianista, areglista y hasta un "Orchestrator", aunke e debe un par di boso y otronan (artista/musiconan
cu no a bay NY, compania di zonido, etc) hopi placa ainda, pero let bygones be bygones, right?”, asina el
a puntra.

Di otro banda Johnny Croes ta di opinion cu miho e keda positivo y aunke e tin su opinion y pensamento,
e ta desea e proyecto aki tur clase di exito. “Y un biaha mas, no tabata mi intencion pa a yama boso a
bunch of hypocritical morons y mil despensa pa cu esaki pasobra boso NO ta a bunch of hypocritical
morons!”
Na final, Johnny Croes a aclaria cu e tabata un di e prome personanan cu a wordo acerca pa aregla y
dirigi e proyecto di e himno, pero ora el a tende cuanto placa e proyecto aki lo costa, el a dicidi pa no haci
esaki. “Mi a haya cu no tabata necesario y e no ta un prioridad pa gasta asina tanto placa na un grabacion
di e himno. Kisas por a uza e placa aki pa drecha nos Cas di Cultura of un muziekschool nobo of busca
mas docentenan cualifica di musica, instrumentonan musical etc”.
Johnny Croes ta director adhunto na Arubaanse Muziekschool, conoci tambe como Scol di Musica Rufo
Wever pa mas di 15 aña caba. El a studia y gradua pa “Music Production & Engineering” na Berklee
College of Music na aña 1995.