Page 80 - MIN TTC 27 FEB 2016

Meta di Aruba ta pa desaroya nos islanan como islanan di
oportunidad pa paisnan Europeo

Friday, 26 February 2016 19:57
Comparti

Aruba a asumi presidencia di OCTA, Asociacion di pais y teritorionan ultramar di Union Europeo,
diahuebs 25 di maart 2016. "E tema central di presidencia di Aruba ta pa enfatisa e balor agrega di e
paisnan miembro di OCTA pa paisnan Europeo.

Cu Hulanda ocupando actualmente presidencia di conseho di Union Europeo, mi ta mira
oportunidadnan pa reforsa e lasonan entre OCTA y UE y explora oportunidadnan pa mas asina por sigui
desaroya e relacion economico," Prome Minister Mike Eman di Aruba a splica na momento cu el a tuma
presidencia di e asociacion.
Eman a tuma presidencia over for di nos bisiña, Corsou. E vision di Eman ta pa desaroya e relacion entre
Europa y e miembronan di OCTA den un direccion di un partnership economico fuerte. "Hopi di e pais y
teritorionan envolvi ta situa den Caribe of un otro region leu di Europa. Un punto perfecto pa wordo uza
pa companianan Europeo como un hub pa mercadonan den e regionnan serca di e islanan. Na Aruba nos
ta trahando riba esaki y por ehempel nos a atrae e companianan di research mas grandi di Hulanda,
TNO, Schiphol Group y Port of Amsterdam. E companianan aki tin sucursalnan na Aruba, nan ta haci
trabounan den nos region y nan ta emplea nos trahadonan."
Segun Eman, e ta hopi interesante pa un companianan Europeo tin partnernan den un region cerca di un
mercado nobo cu nan kier desaroya. "Un partner cu conoce e cultura di comercio di tur dos pais y ta
domina idiomanan local ta valioso ora ta desaroya mercadonan nobo. E contactonan lo ta mas facil, pero
tambe mas lihe."
E aña cu ta bin, Prome Minister ta bay traha duro riba convence gobiernonan di UE cu OCTA tin balor
agrega pa nan strategia economico. "Loke nos kier durante nos presidencia, ta pa reenforsa e potencial di
e miembronan di OCTA y desaroya e vision cu tin mas oportunidadnan 'win-win' trahando hunto cu e
paisnan envolvi den esaki ta realisa nan mes na e momentonan aki. Nos lo kier wordo considera islanan
di oportunidad."